अमरावती  ः कोरोना विषाणूंचा प्रादुर्भाव रोखण्यासाठी शासन उपाययोजनांवर भर देत आहे. त्या अंतर्गत आमदार देवेंद्र भुयार यांनी राजुरा बाजार येथे स्वतः जंतुनाशकांची फवारणी केली. सुमारे तीन तास ट्रॅक्‍टर चालवत त्यांनी हे काम केले.

कोरोना नियंत्रणासाठी केंद्र सरकारने देशपातळीवर २१ दिवसाचे लॉकडाऊन जाहिर केले आहे. त्यासोबतच शहरे व गाव पातळीवर खबरदारी म्हणून शिफारसीत रसायनांची फवारणी केली जात आहे. याच उपाययोजनेचा एक भाग म्हणून राजुरा बाजार येथे मोर्शी मतदार संघाचे आमदार देवेंद्र भुयार यांनी जंतुनाशकांची फवारणी केली.

लॉकडाऊनच्या काळात घरात राहणे, सोशल डिस्टन्सिंग पाळणे यावर नागरिकांनी भर दयावा, असे आवाहन त्यांनी केले आहे. जिल्हा परिषद सदस्य राजू बहुरुपी, तालुका वैद्यकीय अधिकारी डॉ. अमोल देशमुख, माजी सरपंच किशोर गोमकावळे, शेषराव निमजे, राहूल श्रीराव, प्रवीण नथिले, प्रदीप बहुरुपी, नामदेव बहुरुपी, गजानन निकम तसेच ग्रामपंचायत कर्मचारी यावेळी उपस्थित होते.