Chh. Sambhajinagar News : खरीप हंगामात शेतकऱ्यांनी लागवड केलेल्या बहुतांश शेतमालाची काढणी सुरू आहे. आता रब्बी हंगामातील मशागतीला वेग आला आहे. पैठण तालुक्यात काही भागांत गहू, हरभरा या पिकांची पेरणी सुद्धा सुरू आहे.

अशातच कापूस वेचणी व रब्बीच्या पेरणीसाठी मजुरांची टंचाई जाणवत असल्याने शेतकरी मेटाकुटीला आला आहे. परिणामी मजुरांच्या शोधात शेतकऱ्यांची धावपळ होत आहे. मजुरांअभावी पांढरे सोने शेतातच पडून आहे.

एकीकडे निसर्गाची अवकृपा तर दुसरीकडे शासनाचे शेतकरीविरोधी धोरण यामुळे शेतीला दिवसेंदिवस अवकळा आली आहे. शेती कामासाठी मजूर मिळत नसल्याने शेतकऱ्यांना मजुरांसाठी शोधाशोध करावी लागत असून, मजुरांची मनधरणी करताना शेतकरी दिसून येत आहेत.

आधीच शेतकरी शेती साहित्याच्या वाढलेल्या दरांमुळे मेटाकुटीस आला आहे. रासायनिक खते, औषधींच्या किमती गगनाला भिडल्या आहे. त्यात उत्पादन क्षमता देखील कमी झाली आहे.

कापूस वेचणीसाठी मजुरीचा खर्चही वाढला

कापूस कमी दरात शेतकऱ्यांना विकावा लागत असला, तरी ८ ते ९ रुपये किलोप्रमाणे बाहेरील मजूर आणून कापूस वेचणी करावी लागत आहे. सध्या सर्वत्र कापूस वेचणीची लगबग सुरू झाली असून, शेतकऱ्यांना कापूस वेचणी करण्यासाठी मजुरांच्या शोधत फिरावे लागत आहे. वेचणीचा खर्च वाढल्याने तसेच कापसाला बाजारपेठेत चांगला दर नसल्याने शेतकऱ्यांत नाराजीचा सूर उमटत आहे.