Mahesh Gaikwad
कुत्रा हा सर्वात इमानदार आणि विश्वासू प्राणी आहे. जगभरात कुत्र्यांच्या असंख्य प्रजाती आढळतात.
कुत्र्यांच्या काही जाती त्यांच्या सुंदर दिसण्यामुळे लोकांना आकर्षित करतात. पण आज आम्ही तुम्हाला जगातील सर्वात कुरूप कुत्र्याबद्दल सांगणार आहोत.
अमेरिकेच्या कॅलिफोर्नियामध्ये दरवर्षी कुत्र्यांची एक स्पर्धा आयोजित केली जाते. पण ही स्पर्धा सुदंर श्वानांची नाही, तर सर्वात कुरूप दिसणाऱ्या श्वानांची असते.
या स्पर्धेत सर्वात कुरूप दिसणाऱ्या श्वानाला विजेता घोषित करून पुरस्कार दिला जातो.
२०२४ या वर्षातील श्वानांची ही स्पर्धा नुकतीच पार पडली. या स्पर्धेमध्ये वाईल्ड थांग नावाच्या श्वानाला जगातील सर्वात कुरूप कुत्र्याचा पुरस्कार देण्यात आला आहे.
अॅन लुईस ही या कुत्र्याची मालकीन असून स्पर्धा जिंकल्यानंतर या श्वानाला ५ हजार डॉलर्सची रक्कम पुरस्कारामध्ये देण्यात आली आहे.
वाईल्ड थांग हा कुत्रा पेकिंगीज जातीचा आहे. या श्वानाचे वय ८ वर्षे असून या जातीचा श्वान सर्वात पहिल्यांदा चीनमध्ये आढळला होता.
वाईल्ड थांग हा कुत्रा अमेरिकेच्या ओरेगन स्थित नॉर्थ बेंड शहरातील असून यापूर्वी या श्वानाने या स्पर्धेमध्ये तीनवेळा सहभाग घेतला आहे.
तीनही वेळेस हा श्वान दुसऱ्या क्रमांकावर राहिला होता. परंतु यंदाच्या वर्षी या श्वानाने पहिला क्रमांक पटकावत स्पर्धा जिंकली आहे.
वाईल्ड थांग हा कुत्रा डिस्टेम्प्टर नावाच्या आजाराने ग्रस्त आहे. या आजारामुळे जनावरांची रोग प्रतिकारक शक्ती कमी होते आणि श्वसन प्रणाली संक्रमिक होते.