Team Agrowon
फळबाग लागवडीपूर्वी जमिनीचा प्रकार, फळझाडांची निवड, बारमाही पाणी व्यवस्था, स्थानिक हवामान, माती, पाणी परिक्षण, कलमांची उपलब्धता या सर्व बाबींचा विचार अवश्य करावा.
उत्तम निचरा, मध्यम खोलीची जमीन फळबाग लागवडीसाठी निवडावी.
फळबागेसाठी विशिष्ट प्रकारचे हवामान आवश्यक असते. चिकू, आंबा, केळी या फळपिकांना तुलनेने जास्त उष्ण हवामान मानवते.
लागवडीपूर्वी माती परिक्षण अवश्य करावे. फळझाडांची कलमे अनेक प्रकारच्या जमिनीत येऊ शकतात. तथापि, मध्यम प्रतीची, पोयटायुक्त, पाण्याचा निचरा होणारी जमीन योग्य असते.
निवडलेल्या जमिनीची उन्हाळी खोल नांगरट करून कुळवाच्या २ ते ३ पाळ्या द्याव्यात. त्यानंतर जमीन समपातळीत आणून योग्य अंतरावर खड्डे खोदण्यासाठी बागेची आखणी करावी.
फळबाग लागवडीसाठी चौरस, आयताकृती पद्धत तर डोंगर उतारासाठी कंटूर पद्धत वापरली जाते. घन लागवडीमध्ये जोड ओळ पद्धत तसेच ताटी पद्धतीचा फळपिकांनुसार अवलंब केला जातो.
पावसाचे प्रमाण कमी असलेल्या ठिकाणी पावसाळ्याच्या सुरुवातीला लागवड करावी. तर पाऊसमान जास्त असलेल्या ठिकाणी पाऊस कमी झाल्यावर किंवा ऑगस्ट, सप्टेंबरमध्ये लागवड करावी.