Pesticide Use : किडनाशके फवारताना अशी काळजी घ्या होणार नाही विषबाधा

कीडनाशकाची शेतात फवारणी करतेवेळी प्रथमोपचार साहित्य सोबत ठेवावे.

खाद्य पदार्थ, इतर औषधांसोबत कीडनाशकांचा संपर्क येऊ देऊ नये; तसेच कीडनाशके लहान मुलांच्या संपर्कात येणार नाहीत, अशा ठिकाणी कुलूप बंद ठेवावीत.

फवारणी करताना अंगरक्षक कपडे, हातमोजे, चष्मा, मास्क, टोपी, बूट इ. चा वापर करावा. संपूर्ण शरीर झाकले जाईल, याची काळजी घ्यावी.

कीडनाशक वापरण्यापूर्वी लेबल व माहितीपत्रक व्यवस्थित वाचून खबरदारीच्या सर्व सूचनांचे पालन करावे.

तणनाशके फवारणीचा पंप कीडनाशक फवारणीसाठी वापरू नये. कीडनाशके फवारणीसाठी हातापायावर जखम असलेल्या व्यक्तींची निवड करू नये.

फवारणीदरम्यान नोझल गच्च झाल्यास किंवा कचरा अडकल्यास तोंडाने साफ करू नये. तारेचा वापर करावा.

फवारणीचे काम सुरू असताना खाणे, पिणे, तंबाखूचे सेवन, धूम्रपान अगर मद्यपान करू नये.

कीडनाशक हाताळताना नेहमी हातात हातमोजे घालावेत. कीडनाशकाचे द्रावण हाताने न ढवळता काडीच्या साह्याने हातात हातमोजे घालूनच ढवळावे.

कीडनाशकाचे रिकामे डबे शेतात फेकून देऊ नयेत. रिकामे डबे, बाटल्या यांची योग्य विल्हेवाट लावावी. त्यामध्ये  विहीर, नदीपासून दूर जमिनीत सुरक्षित ठिकाणी खोल गाडून टाकावेत.