Team Agrowon
पावसाळा सुरू झाला की, वातावरणातील बदलांमुळे जनावरांना विविध रोगांची लागण होते. वातावरणात वाढलेल्या ओलाव्यामुळे जनावरांना आजारांचा संसर्ग होतो.
पावसाळ्यात जनावरांना होणाऱ्या आजारांपैकी एक म्हणजे कासदाह किंवा सडांचा आजार. गायी-म्हशींमध्ये हा आजार मोठ्या प्रमाणात दिसून येतो.
या आजारामुळे जनावर दूध देत नाही. परिणामी दूध उत्पादनावर त्याचा परिणाम होतो.
जीवाणू तसेच बुरशीजन्य घटकांच्या प्रादुर्भावामुळे कासदाह होतो. तसेच शारीरिक इजा आणि अस्वच्छतेमुळेही कासदाह होतो.
कासदाह झालेल्या जनावराचे सड आणि कास सुजते. सडाला स्पर्श केल्यानंतर जनावराला वेदना होतात. दूध काढू नये म्हणून जनावर लाथा मारते.
कासदाह आजाराला प्रतिबंध करण्यासाठी जनावराची कॅलिफोर्निया चाचणी करावी. लवकर चाचणी केल्याने आजारावर नियंत्रण मिळविणे सोपे जाते.
गायी-म्हशींच्या गोठ्याची स्वच्छता ठेवावी. सड स्वच्छ ठेवावेत. स्वच्छतेसाठी वेगळे कापड किंवा कागदी टॉवेल वापरावा.
कासदाह आढळल्यानंतर कासेवर बर्फाच्या तुकड्याने शेक द्यावा. संक्रमित सडाचे दूध दिवसातून तीनवेळा बाहेर काढावे.
तसेच प्रादुर्भाव जास्त असल्यास त्वरीत पशुवैद्यकाच्या सल्ल्याने उपचार सुरू करावेत.