Team Agrowon
हलक्या, मुरमाड, डोंगरी भागात कमी खर्चामध्ये येणारे पीक म्हणून शेतामध्ये किंवा बांधावर करवंद लागवड करावी.
करवंद हे एक अत्यंत काटक व दुर्लक्षित झुडूपवर्गीय फळपीक आहे.
शेताभोवती करवंदाची सजीव कुंपण म्हणून लागवड केल्यास मुख्य पिकाव्यतिरिक्त अधिक उत्पन्न मिळण्याबरोबर जंगली किंवा मोकाट प्राण्यांपासून शेताचे संरक्षण होते.
उष्णकटिबंधीय आणि उपोष्णकटिबंधीय हवामानात योग्य वाढ होते. मुसळधार पाऊस आणि पाणी साचलेली जमीन फळपिकास उपयुक्त नाही.
लागवड वालुकामय चिकण माती, जांभा, वाळू व काळी माती असलेल्या जमिनीमध्ये केली जाते. खडकाळ, मुरमाड, पडीक, कातळ आणि हलक्या जमिनीत सुद्धा चांगले वाढते. या पिकास पाण्याची गरज खूप कमी आहे. परंतु नव्याने लावलेल्या झाडांना पाणी द्यावे.
करवंदाची कोकण बोल्ड ही जात डॉ. बाळासाहेब सावंत कोकण कृषी विद्यापीठाने प्रसारित केली आहे. महाराष्ट्रामध्ये सर्वत्र लागवडीसाठी याची शिफारस आहे. केंद्रीय शुष्क प्रदेशीय संशोधन संस्थेने मरू गौरव ही नवीन व जास्त उत्पादनक्षम जात विकसित केली आहे.
तीन वर्षांनी बागेपासून उत्पादन मिळण्यास सुरुवात होते. झाड जसजसे मोठे होत जाईल, तसतशी उत्पादनात वाढ होते.