Team Agrowon
जनावरांच्या आहारावर जवळपास ७० टक्के खर्च होतो. आहाराकडे विशेष लक्ष दिले तर दूध उत्पादन किफायतशीर होते, आरोग्य व प्रजनन उत्तम राहते.
चांगल्या प्रतीची प्रथिने, इतर पोषक द्रव्ये मिळण्यासाठी हिरवा चारा देताना, त्यामध्ये द्विदल चारा जसे की, लुसर्न, बरसीम, मूग, भुईमूग, उडीद यासोबत मका, ज्वारी इत्यादीचे १:३ प्रमाण असावे.
चांगल्या दर्जाचे खनीज, क्षार मिश्रण निवडावे. खनिजाच्या आहारातील अभावामुळे जनावरास बरेच आजार होतात, दूध उत्पादन कमी होते, वंधत्व येते, जनावर माजावर येत नाही.
पशुखाद्य किंवा चाऱ्यात एकदम बदल केल्यास, जनावरे पाहिजे त्या प्रमाणात चारा खात नाहीत. कमी चारा खाल्ल्यास अपचनाचा त्रास होऊ शकतो.
कोरडा चारा पाण्यामध्ये भिजवून नंतर खाण्यास द्यावा. चाऱ्याची कुट्टी करून द्यावी. निकृष्ट चाऱ्यावर तज्ञांच्या मार्गदर्शनाने प्रक्रिया करावी.
जंताच्या प्रादुर्भावामुळे वासरू खंगत जाऊन वाढ खुंटते, पोटाचे आकारमान वाढते, त्वचा खरखरीत होऊन केस गळतात.
गाई, म्हशीचे दूध आटविल्यानंतर खुराक बंद न करता वासरांच्या वाढीकरिता किमान अडीच किलो खुराक सुरू ठेवावा. जेणेकरून गर्भात वासराची योग्य वाढ होऊन प्रजननातील अडथळे दूर होतात. वासरे सुदृढ जन्माला येतात.