Team Agrowon
बदाम उत्पादनात जगात अमेरिका आघाडीवर आहे. अमेरिकेतील कॅलिफोर्निया हे राज्य सर्वांत मोठे बदाम उत्पादक राज्य आहे.
जगाच्या तुलनेत ८० टक्के उत्पादन कॅलिफोर्निया राज्यात होते. अठराव्या शतकात स्पॅनिश मिशनऱ्यांनी कॅलिफोर्नियामध्ये बदाम आणला.
अनुकूल वातावरण आणि जमिनीमुळे येथील शेतकऱ्यांनी बदाम लागवडीस सुरुवात केली. बदामाचे झाड २५ ते ३० वर्षांपर्यंत उत्पादन देते. या पिकास कमी पाणी लागते.
बदामाच्या अल्ट्रा, बट्टे, कॅलिफोर्निया, पेपर शेल, पियरलेस, कार्मेल, मखदूम, वारीस या जाती चांगले उत्पादन देतात. साधारण तीन ते पाच वर्षांत फळे यायला सुरुवात होते.
परागीभवनासाठी मधमाश्या फार महत्त्वाच्या भूमिका बजावतात. त्यामुळे बदामाच्या फळबागेत मधमाशीपालन व्यवसायाला चालना मिळाली आहे.
बदामाच्या कवचाचा उपयोग पशुखाद्यामध्ये केला जातो. कॅलिफोर्नियामध्ये सप्टेंबर-ऑक्टोबरपासून परिपक्व फळे झाडावरून काढली जातात.
मोठ्या यंत्राद्वारे बदामाची झाडे हलवली जातात. जमिनीवर पडलेली फळे तिथेच आठ, दहा दिवस वाळवली जातात किंवा यंत्राद्वारे गोळा करून ती सावलीमध्ये वाळवून प्रक्रिया केली जाते.
कॅलिफोर्निया परिसरात बदाम प्रक्रिया करणारे मोठे प्रकल्प कार्यरत आहेत. त्यांनी या बदामाचे जागतिक पातळीवर चांगले ब्रॅण्डिंग केले आहे.