Team Agrowon
तब्बल दीड महिना विलंबाने या वर्षीचा जांभूळ हंगाम सुरू झाला असला तरी उत्पादकांच्या पदरी घोर निराशाच आली आहे.
१० टक्केदेखील उत्पादन आले नसल्यामुळे जांभूळ उत्पादक संकटात सापडले आहेत.
एकीकडे उत्पादन कमी असताना दुसरीकडे जांभळाला प्रतिकिलो २५० रुपयांचा दर मिळत असल्याने उत्पादकांना किंचित दिलासा मिळत आहे.
गेल्यावर्षी पहिल्या टप्प्यातील हंगाम १६ मार्चपासून सुरू झाला. त्यानंतर हंगाम जूनच्या पहिल्या आठवड्यापर्यंत सुरू होता. परंतु यावर्षी ४ मे पासून हंगाम सुरू झाला. मात्र या हंगामाची सुरुवात जाभूळ उत्पादकांसाठी निराशाजनक राहिली आहे.
दरवर्षीच्या तुलनेत दहा टक्केदेखील जांभूळ उत्पादन मिळत नसल्यामुळे उत्पादकांमध्ये नाराजी आहे.
दरवर्षी प्रतिकिलो १०० रुपये दर असायचा परंतु यावर्षी प्रतिकिलो २५० रुपये दर जाभळाला मिळत आहे. चांगल्या दराचा उत्पादकांना दिलासा मिळत असला तरी उत्पादनात मोठी घट आहे.
जांभूळ हंगाम सुरू होऊन १३ ते १४ दिवस झाले आहेत. परंतु अपेक्षित आवक झालेली नाही. त्यामुळे उत्पादकांबरोबरच जांभूळ व्यावसायिक देखील मेटाकुटीला आले आहेत.