Team Agrowon
कोथिंबिरीची लागवड आपल्याकडे सर्व प्रकारच्या जमिनीत वर्षभर करण्यात येते. लागवडीसाठी मध्यम, काळी व निचऱ्याची जमीन निवडावी.
लागवडीपूर्वी जमिनीत पुरेसे शेणखत मिसळावे. डी.डब्ल्यू.डी.- ९, वैशाली, जीसी- १, २, ३ या जातींची निवड करावी.
लागवडीसाठी हेक्टरी ३० ते ४० किलो बियाणे लागते. बियाणे खरबडीत भागावर घासून घ्यावे. त्यानंतर लागवडीपूर्वी प्रति किलो बियाण्यास तीन ग्रॅम थायरमची बीजप्रक्रिया करावी. त्यानंतर लागवड करावी.
लागवडीपूर्वी शेत ओले करून घ्यावे. त्यामुळे उगवणक्षमता वाढते.
पाणी देण्यासाठी सारे पद्धतीचा अवलंब करावा. लागवडीनंतर हलके पाणी द्यावे. म्हणजे बी वाहून जात नाहीत.
कोथिंबिरीसाठी प्रति हेक्टरी १०० किलो नत्र, ५० किलो स्फुरद आणि ५० किलो पालाश माती परीक्षणानुसार द्यावे. यापैकी अर्धे नत्र व संपूर्ण स्फुरद व पालाश लागवडीच्या वेळी द्यावे.
राहिलेले नत्र लागवडीनंतर १५ ते २० दिवसांनी द्यावे. पिकाच्या गरजेनुसार पाणी द्यावे.