Team Agrowon
गेल्या काही दिवसांपासून राज्यात उसावरून राजकारण चांगलचं तापलं आहे. यातच आता इथेनॉल बंदिची भर पडली आहे. मात्र यामुळे आता मका पिकाला चांगले दिवस येणार आहे. तर शेतकऱ्यालाही दोन पैसे मिळतील.
केंद्र सरकारने उसाच्या रसापासून बनणाऱ्या इथेनॉलवर बंदी घातली आहे. तर मक्याला यातून वगळले आहे. ज्यामुळे आता इथेनॉलसाठी मक्याला मागणी वाढण्याचा अंदाज अभ्यासकांनी व्यक्त केला आहे.
देशात मागील हंगामात मका उत्पादन हे ३५९ लाख टन झाले होते. जे या वर्षी ३४३ लाख टनांवर स्थिरावण्याची शक्यता आहे. यंदा उत्पादन घटण्याचे महत्वाचे कारण म्हणजे पाऊस कमी. त्याचा फटका मका पिकाला बसला.
देशात ऑगस्ट महिन्यापासून मक्याचे भाव काहीसे वाढले आहेत. पण दुसरीकडे आंतरराष्ट्रीय बाजारात मक्याचे भाव कमी होत गेले. त्यामुळे भारताचा मका आंतरराष्ट्रीय बाजारात महाग होत गेला.
एकीकडे ऊस आणि उसाच्या रसापासून इथेनॉल निर्मीतीवर बंदी घालताना देशातील इथेनॉल उत्पादन घटणार नाही, असाही दावा सरकारने केला. यामुळे धान्यापासून इथेनॉल निर्मिती वाढू शकते.
देशात केवळ मक्याचा पुरवठा चांगला दिसतो आणि किमतीही नियंत्रणात आहेत. त्यामुळे इथेनॉलसाठी मक्याचा वापर वाढू शकतो. एक टन मक्यापासून ३७० लिटर इथेनॉल मिळते.
देशात यंदा ३२५ लाख टन मक्याचा वापर होण्याचा अंदाज आहे. यापैकी २०० लाख टन पशुखाद्यसाठी होऊ शकतो तर १२५ लाख टन मानवी आहार, बियाणे आणि औद्योगिक वापरासाठी होऊ शकतो, असाही अंदाज आहे.