Team Agrowon
हुमणी ही एक बहुभक्षी कीड आहे. तिचे नियंत्रण करताना भुंगेरे आणि अळी दोघांचेही व्यवस्थापन गरजेचे असते.
उन्हाळ्यात जमिनीची खोल १५ ते २० सेंमी नांगरणी करावी. त्यामुळे जमिनीतील सुप्त अवस्थेतील भुंगेरे वर येऊन सूर्यप्रकाशाने मरतात किंवा पक्षी त्यांना खातात.
भुंगेरे रात्री झाडांवर बसतात, त्यावेळी फांद्या हलवून ते खाली पाडावेत आणि रॉकेलच्या पाण्यात टाकून नष्ट करावेत.
सायंकाळी ७.३० ते ८.३० या वेळेत प्रकाश सापळे लावावेत आणि जमा झालेले भुंगेरे नष्ट करावेत. सामूहिक सहभाग आवश्यक आहे.
बाभूळ व कडुनिंबाच्या फांद्यांवर कीटकनाशकाची फवारणी करून त्या शेतात ठेवाव्यात. पाने खाल्ल्याने भुंगेरे मरतात.
निंदणी व कोळपणी करताना अळ्या वर येतात व सूर्यप्रकाशाने मरतात. अळ्या हाताने वेचूनही नष्ट करता येतात.
हुमणीच्या अळ्या आणि भुंगेरे हे पक्षी, मांजर, कुत्रे आणि मुंगुस खातात, त्यामुळे नैसर्गिकरीत्या नियंत्रण होते.
मेटारायझिम अॅनिसोप्ली १० किलो प्रति हेक्टर वापरावा. ही बुरशी हुमणीच्या अळीला रोगग्रस्त करते आणि १० ते १५ दिवसांत मरते.
फिप्रोनील (४० टक्के) आणि इमिडाक्लोप्रीड (४० टक्के डब्ल्यू.पी.) हे संयुक्त कीटकनाशक ऊसासाठी ४ ग्रॅम आणि भूईमुगासाठी ३ ग्रॅम प्रमाणात, १० लिटर पाण्यात मिसळून आळवणीसाठी फवारावे.