Silver Market : चांदी दरात वाढीचा कल

Jalgaon News : चांदी दरात मागील काही दिवसांत तेजी दिसत आहे. सात दिवसांत चांदीचे दर एक किलोमागे तब्बल ३३०० रुपयांनी वाढले. दर ७४ हजार ३०० रुपये प्रतिकिलो असे आहेत. मागील तीन ते साडेतीन आठवडे चांदीचे दर ७० ते ७२ हजार रुपये प्रतिकिलो होते. त्यात मात्र मागील सात दिवसांत मोठी वाढ दिसून आली. जळगावातील सराफ बाजारातील दर शनिवारी (ता. २६) दुपारी ७४ हजार ३०० रुपये होते.

सोने दरातही किरकोळ वाढ किंवा किरकोळ घट दिसत आहे. सराफ बाजारात शनिवारी (ता. २६) सोन्याचे दर ५९ हजार १०० रुपये प्रतितोळा होते. अधिक मास महिन्यात सोने-चांदीच्या दरात वाढ दिसत होती. फारशी घटही झाली नाही. परंतु अधिक महिना संपत आला तशी सोने-चांदीच्या दरातही किरकोळ घटीचा कल दिसत होता. चांदीचे दर साधारणतः ६ ऑगस्टनंतर कमी होत गेले. ७ ते १९ ऑगस्ट या दरम्यान फारशी वाढ चांदी दरात दिसत नव्हती.

७० हजार ५०० रुपये सरासरीचा दर या काळात चांदीला किलोमागे मिळाला. परंतु मागील सहा ते सात दिवसांत चांदी दरात वाढीचाच कल दिसला आहे. यामुळे दर ७४ हजार रुपयांवर पोहोचले. २२ ऑगस्ट रोजी चांदीच्या दरात मोठी म्हणजेच एक हजार ६०० रुपये, एवढी वाढ एक किलोमागे झाली. यानंतर वाढ होतच राहिली.

२३ ऑगस्ट रोजीदेखील चांदीचे दर ४०० रुपयांनी वधारले. २३ ते २४ ऑगस्ट दरम्यान चांदीचे दर ७४ हजार ४०० रुपये प्रतिकिलो होते. २५ ऑगस्ट रोजी चांदी दरात ४०० रुपये घसरण एक किलोमागे झाली. पण त्यात पुन्हा शनिवारी वाढ होऊन दर ७४ हजार ३०० रुपये प्रतिकिलो झाले. आंतरराष्ट्रीय बाजारात चांदीची मागणी आहे. यामुळे दरवाढ झाली असे जाणकारांनी सांगितले.

सोने दरात किरकोळ वाढ

सोने दरातही वाढ दिसत आहे. सोन्याचे दर मागील आठवड्यात ५८ हजार ८०० रुपये प्रतितोळा होते. २२ ऑगस्ट रोजी सोने दरात वाढ झाली व दर प्रतितोळा ५९ हजार रुपये झाले. त्यानंतर पुन्हा सोने दरात किंचित वाढ झाली. २५ ऑगस्ट रोजी दर ५९ हजार १०० रुपये प्रतितोळा झाले.

सोने दर शनिवारीदेखील (ता. २६) ५९ हजार १०० रुपये प्रतितोळा होते. जळगावातील सराफ बाजारात तीन दिवस सोने दर स्थिर आहेत, अशी माहिती मिळाली. सोने खरेदीसंबंधी चाकरमानी, नोकरदारवर्ग अधिक प्रतिसाद देत आहे. ग्रामीण भागातून प्रतिसाद कमी आहे. कारण पीक हवे तसे नाही. तसेच इतर शेतीमालाबाबतही समाधानकारक स्थिती नाही, असे सांगण्यात आले.