Moong Market : मूगाला प्रतिक्विंटल १३ हजार रुपये कमाल दर

Jalgaon News : खानदेशातील बाजार समित्यांत मुगाची आवक मागील वर्षीसारखीच कमी आहे. यंदा दर ११ हजार ८०० व कमाल १३ हजार रुपये प्रतिक्विंटल आणि सरासरी १२ हजार रुपये प्रतिक्विंटल, असा मागील काही दिवसांपासून राहिला आहे.

उत्पादन अल्प किंवा कमी आहे. तापी, गिरणा, पांझरा नदीकाठी काळ्या कसदार जमिनीत एकरी दोन ते सव्वादोन क्विंटल मुगाचे उत्पादन आले आहे.

अनेकांचे पीक ऑगस्टमधील कमी पावसाने हातचे गेले. मागील वर्षी अतिवृष्टीत मूग पिकाची अतोनात हानी झाली होती. यंदा कमी पावसात मुरमाड, हलक्या जमिनीत पिकाला मोठा फटका बसला. यामुळे ऑगस्टमध्येच उत्पादनात ६० टक्के घट मानली जात होती. तापी, गिरणा, पांझरा, अनेर नदीच्या क्षेत्रातील व सातपुडालगतच्या काळ्या कसदार जमिनीत पीक कसेबसे तग धरून होते.

त्यातही फुले गळून पडली. शेंगा हव्या तशा लगडल्या नाहीत. कारण ऑगस्टमध्ये तब्बल २७ दिवस पाऊस नव्हता. ऊनही पडत होते. काही शेतऱ्यांनी पाट पद्धतीने व तुषार सिंचनाच्या मदतीने सिंचन केले. यामुळे काही शेतकऱ्यांचे पीक निम्मे हाती आले आहे.

परंतु बाजार समित्यांत मुगाची आवक अल्प आहे. चोपडा येथील बाजार समितीत मागील १५ ते २० दिवसांत आठवड्यातून तीन ते चार दिवसच मुगाची आवक झाली आहे.

ही आवक प्रतिदिन सरासरी ३५ क्विंटल अशी आहे. मुगाला तेथे या आठवड्यात किमान ११ हजार ७०० ते १३ हजार रुपये प्रतिक्विंटलचा दर मिळाला. खानदेशात धुळ्यातील शिरपूर, नंदुरबारातील नंदुरबार, शहादा, जळगावमधील अमळनेर येथील बाजारांतच मुगाची आवक झाली असून, तीदेखील अल्प आहे.

जळगाव बाजार समितीतही मागील १० ते १२ दिवसांत काही दिवसच आवक झाली आहे. मुगाचे दर कमाल १३ हजार रुपये प्रतिक्विंटल, असे आहेत. परंतु उत्पादन अल्प आहे. मजुरी दर परवडणारे नाहीत. यामुळेदेखील हे दरही परवडत नसल्याचे शेतकऱ्यांचे म्हणणे आहे. काही शेतकऱ्यांच्या मूग पिकात पाच ते १० टक्केच उत्पादन हाती आले.

या क्षेत्रातील मूग पीक शेतकऱ्यांनी मोडून त्यात आता रब्बी हंगामासाठी मशागत केली आहे. मुगाचे दर मागील वर्षीच्या तुलनेत अधिक आहेत. मागील वर्षी मुगास सरासरी १० हजार रुपये प्रतिक्विटलचा दर मिळाला होता. परंतु यंदा सरासरी दर १२ हजार रुपयांवर आहेत.