१) कापूस आवक काहीशी घटली (Cotton Arrival)
मे महिन्याच्या शेवटच्या आठवड्यापासून कापूस आवक काहीशी कमी होत गेली. आज बाजारात ८० हजार गाठींच्या दरम्यान आवक झाली होती. तर दरपातळीत काहीशी वाढ झाली होती. पण सरासरी दर आजही ६ हजार ७०० ते ७ हजार ५०० रुपयांच्या दरम्यान होते.
कापसाची आवक येथून पुढे कमीकमी होत जाईल. त्यामुळे दरही सुधारतील, असा अंदाज जाणकारांनी व्यक्त केला.
२) सोयाबीनचा बाजार स्थिरावला (Soybean Market)
देशातील बाजारात आजही सोयाबीनची आवक एक लाख क्विंटलच्या दरम्यान होती. तर दरपातळी आज ४ हजार ७०० ते ५ हजार ३०० रुपयांवर कायम होती. सोयापेंडला निर्यातीसाठी मागणी कमी आहे. त्यातच आंतरराष्ट्रीय बाजारात सोयापेंडचे दर दबावात आहेत.
त्यामुळे सोयापेंड बाजारात स्थानिक मागणीवरच जास्त अवलंबून राहील. तर सोयाबीनच्या दरात पुढील काळात चढ उतार दिसू शकतात, असा अंदाज जाणकारांनी व्यक्त केला
३) कैरीला मागणी कायम (Kari Update)
यंदा पावसामुळे गावराण आंब्याला अनेक भागात फटका बसला. त्यातच कैरीचे लोणचे घालण्याची लगबग सुरु आहे. त्यामुळे सध्या कैरीला मागणी आहे. काही बाजारात कैरीची आवक कमी होतेय.
त्यामुळे कैरीला सरासरी १ हजार ५०० ते २ हजार ५०० रुपयांच्या दरम्यान भाव मिळत आहे. पुढील काळात कैरीची आवक कमी होण्याची शक्यता आहे. त्यामुळे दरही टिकून राहतील, असा अंदाज व्यापारी व्यक्त करत आहेत.
४) डाळिंबातील तेजी टिकून (Pomegranate rate)
यंदा सुरुवातीपासूनच डाळिंबाची बाजारातील आवक सरासरीपेक्षा कमीच राहीली. कमी झालेले क्षेत्र, पाऊस आणि कीड-रोगाचा फटका यामुळे उत्पादन घटले. तसेच गुणवत्ता खालावली. परिणामी बाजारात गुणवत्तापूर्ण मालाची टंचाई जाणवत आहे.
यामुळे दरही तेजीत आहेत. सध्या डाळिंबाला प्रतिक्विंटल सरासरी ७ हजार ते ११ हजार रुपयांच्या दरम्यान भाव मिळत आहे. डाळिंबाचे दर चालू हंगामात तेजीतच राहू शकतात, असा अंदाज अभ्यासकांनी व्यक्त केला.
५) मुगाच्या दरात पुन्हा वाढ होईल का? (Moong Rate)
देशातील मुगाचे उत्पादन यंदा वाढल्याचा अंदाज सरकारने व्यक्त केला. मागील हंगामात देशात ३२ लाख टन मुगाचे उत्पादन झाले होते. ते यंदा ३७ लाख टनांवर पोचल्याचा अंदाज आहे. पण सरकारच्या या अंदाजाशी शेतकरी, व्यापारी आणि उद्योग सहमत दिसत नाही.
यंदा मुगाच्या उत्पादनात घट झाल्याचं शेतकरीही सांगत आहेत. सध्या मध्य प्रदेशातील बाजारात उन्हाळी मुगाची आवक वाढत आहे. त्यामुळे दरावर काहीसा दबाव आला. दरात मागील काही दिवसांपासून ४०० रुपयांची नरमाई दिसून आली.
पण भाव महीभावापेक्षा अधिकच दिसतात. केंद्राने यंदा मुगाला प्रतिक्विंटल ७ हजार ७५५ रुपये हमीभाव जाहीर केला. सरासरी ८ हजार ते ८ हजार ५०० रुपये दर मिळत आहे. महाराष्ट्रातील बाजारात मुगाचे भाव ७ हजार ५०० ते ८ हजार ३०० रुपयांच्या दरम्यान आहेत. देशातील बाजारात सध्या आवकेचा दबाव असल्याने दरात काहीशी नरमाई दिसून आली.
पण पुढील काही दिवसांमध्ये आवक पुन्हा कमी होण्याचा अंदाज आहे. खरिपातही मुगाचे किती उत्पादन होते यावर पुढील काळातील बाजार अवलंबून असेल, असा अंदाज बाजारातील अभ्यासकांनी व्यक्त केला.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
