Agrowon podcast : हळद आणखी भाव खाणार !

1. कापूस वायदे आणि बाजार समित्यांमधील भागात चढ उतार सुरु आहेत. वायद्यांमध्ये कापसाला आज ५९ हजार ८०० रुपयांचा भाव मिळाला. तर आंतरराष्ट्रीय बाजारातील वायदे ८७ सेंटवर पोचले होते. बाजार समित्यांमधील व्यवहार मात्र नव्या हंगामाच्या पार्श्वभुमीवर थंडावलेले दिसतात. कापसाला बाजार समित्यांमध्ये आज सरासरी ७ हजार ते ७ हजार ७०० रुपयांचा भाव मिळाला. कापसाचे भाव या पातळीवर आणखी काही दिवस दिसू शकतात, असा अंदाज कापूस बाजारातील अभ्यासकांनी व्यक्त केला. 

2. आंतरराष्ट्रीय बाजारात सोयाबीनच्या भावात चढ उतार सुरु आहेत. सीबाॅटवर आज सोयाबीनच्या वायद्यांमध्ये नरमाई आली होती. सोयाबीनच्या वायद्यांनी आज १३.९८ डाॅलर प्रतिबुशेल्सचा टप्पा गाठला होता. तर सोयापेंडचे वायदे आज ४१७ डाॅलरपर्यंत नरमले होते. देशातील सोयाबीन बाजार सध्या सुस्तच आहे. सोयाबीनला सरासरी ४ हजार ४०० ते ४ हजार ९०० रुपयांच्या दरम्यान आहेत. सोयाबीनचे भाव पुढील काही दिवस कायम दिसू शकतात, अशा अंदाज सोयाबीन बाजारातील अभ्यासकांनी व्यक्त केला.
 

3. बाजारात सध्या गाजराची आवक मर्यादीत होत आहे. पण दुसरीकडे गाजराची मागणी कायम आहे. त्यामुळे गाजराचे भाव टिकून आहेत. आज राज्यातील बाजारात गाजराला सरासरी २ हजार ते २ हजार ५०० रुपयांचा भाव मिळाला. गाजराची बाजारातील आवक पुढील काळातही मर्यादीत राहण्याची शक्यता आहे. त्यामुळे गाजराचे भाव कायम दिसू शकतात, असा अंदाज व्यापाऱ्यांनी व्यक्त केला. 

4. सणासुदीच्या काळात हरभऱ्याला मागणी वाढली. त्यामुळे हरभऱ्याचे भाव तेजीत आले आहेत. त्यातच बाजारातील हरभरा आवक कमीच आहे. वाढते भाव कमी करण्यासाठी नाफेड स्टाॅकमधील हरभरा विक्री करत आहे. पण भाव वाढतच आहेत. सध्या हरभऱ्याला बाजारात प्रतिक्विंटल सरासरी ५ हजार ते ६ हजारांचा भाव मिळत आहे. हरभऱ्याचे भाव पुढील काळातही कायम राहू शकतात, असा अंदाज हरभरा बाजारातील अभ्यासकांनी व्यक्त केला.

5. देशातील बाजारात हळदीचे भाव मागील काही महिन्यांपासून तेजीत आहेत. चालू हंगामात हळदीची लागवड कमीच आहे. जून महिन्यात पावसाने हळद उत्पादक भागांमध्ये दडी दिली. लागवडीयोग्य पाऊस नसल्याने लागवडी खोळंबल्या होत्या. महाराष्ट्र, तेलंगणा, कर्नाटक, तमिळनाडू या राज्यांमध्ये लागवड यंदा उशीरा सुरु झाल्या. या सर्व कारणांनी देशातील हळद लागवड यंदा १५ ते २० टक्क्यांनी कमी झाल्याचे शेतकरी सांगत आहेत. निर्यातही यंदा जवळपास २५ ते ३० टक्क्यांनी वाढली आहे.

ऑगस्टमधील पावसाच्या खंडामुळे पिकाला मोठा फटका बसला. यामुळे हळदीच्या दराला आधार मिळाला. आज बाजार समित्यांमध्ये हळदीला प्रतिक्विंटल सरासरी ११ हजार ते १४ हजारांचा भाव मिळत आहे. हळदीच्या वाढलेल्या भावात मागणी कमी झाली. यामुळे भाव काहीसे नरमलेले दिसतात. तर वायद्यांमध्ये चढ उतार सुरु आहेत. ऑक्टोबरचे वायदे १५ हजार २०० रुपयांवर होते. देशातील हळद उत्पादन यंदाही कमी राहील, असा अंदाज आतापासूनच व्यक्त केला जात आहे. तर सणांच्या काळात हळदीला आणखी मागणी वाढण्याची शक्यता आहे. त्यामुळे हळदीचे भाव पुढील काळातही तेजीत राहू शकतात, असा अंदाज हळद बाजारातील अभ्यासकांनी व्यक्त केला.