१) कापसाच्या दरात नरमाई (Cotton Rate)
देशातील बाजारात कापूस दरात आज नरमाई पाहायला मिळाली. बाजारातील आवक आवक जास्त असल्याने दरावर दबाव असल्याचे व्यापारी सांगत आहेत. कापसाच्या भावात मागील तीन दिवसांपासून नरमाई सुरु आहे.
आज कापसाला सरासरी ७ हजार ५०० ते ८ हजार रुपयांच्या दरम्यान भाव मिळाला. काॅटन असोसिएशन ऑफ इंडियाने देशातील कापूस उत्पादनाचा अंदाज पुन्हा कमी केला. त्यामुळं बाजारातील आवक लवकरच कमी होऊ शकते, असा अंदाज कापूस बाजारातील अभ्यासकांनी व्यक्त केला.
२) सोयाबीनचे भाव स्थिर (Soybean Rate)
देशातील बाजारात सोयाबीनचे दर कायम आहेत. सोयाबीनच्या दरात मागील दोन महिन्यांपासून नरमाई आहे. ही नरमाई आजही कायम होती. सोयाबीनची आवक चांगली असल्याने तसेच आंतरराष्ट्रीय बाजारात दरात नरमाई असल्याचा परिणाम दिसत असल्याचे अभ्यासकांनी सांगितले.
सध्या सोयाबीनला सरासरी ४ हजार ९०० ते ५ हजार ३०० रुपयांचा भाव मिळात आहे. देशातील सोयाबीनचे भाव पुढील काही दिवस स्थिर राहू शकतात, असा अंदाज सोयाबीन बाजारातील अभ्यासकांनी व्यक्त केला.
३) शेवग्याचे भाव तेजीत (Shevga Rate)
बाजारात सध्या शेवग्याची आवक सरासरीपेक्षा कमी आहे. त्यामुळे शेवग्याला चांगला भाव मिळत आहे. राज्यातील पुणे, मुंबई, नागपूर आणि नाशिक बाजारात काहीशी आवक जास्त दिसते. पण सरासरीपेक्षा कमीच आहे. त्यामुळे शेवग्याचे दर तेजीत आहेत.
सध्या शेवग्याला प्रतिक्विंटल सरासरी २ हजार ते ३ हजार रुपये प्रतिक्विंटलच्या दरम्यान आहेत. शेवग्याचे दर पुढील काळातही कामय राहू शकतात, असा अंदाज भाजीपाला बाजारातील अभ्यासकांनी व्यक्त केला.
४) लिंबाला वाढला उठाव (Lemon Rate)
वाढत्या उन्हामुळे लिंबाला मागणी वाढली. मात्र बदलते वातावरण आणि पावसामुळे लिंबाचे मोठ्या प्रमाणात नुकसान झाले. परिणामी बाजारातील आवक कमी आहे. यामुळे लिंबाला चांगला भाव मिळत आहे.
सध्या लिंबाचे दर प्रतिक्विंटल सरासरी ५ हजार ते ८ हजार रुपयांच्या दरम्यान आहेत. पुढील काळातही लिंबाची आवक कमी राहण्याचा अंदाज आहे. त्यामुळे वाढत्या उन्हाच्या काळात लिंबाचे दर तेजीत राहण्याचा अंदाज आहे.
५) हरभऱ्याला सध्या काय भाव मिळतोय? (Chana Rate)
देशातील बाजारात हरभरा सध्या दबावात आहेत. बाजारातील आवक सरासरीपेक्षा कमी आहे. पण सरकारच्या धोरणांचा बाजारावर दबाव असल्याचे व्यापारी सांगत आहेत. सरकारने व्यापाऱ्यांकडे हरभरा स्टाॅकची माहिती मागितली आहे.
सरकारने मागील हंगामात स्टाॅकमधील हरभरा टप्प्याटप्याने विकला. हा हरभरा हमीभावापेक्षा कमी दरात बाजारात आला. त्यामुळे खुल्या बाजारात हरभरा भाव मागील वर्षभर दबावात होते. व्यापाऱ्यांना हा अनुभव असल्याने चालू हंगामात नाफेडची खेरदी वाढत असतानाही खुल्या बाजारात हरभरा भाव कमीच आहेत.
नाफेडने देशभरात आतापर्यंत १८ लाख ७८ हजार टन हरभरा खरेदी केला. यापैकी महाराष्ट्रात ६ लाख ४१ हजार टन खरेदी केली. तर मध्य प्रदेशात ६ लाख ५० हजार टनांची म्हणजेच सर्वाधिक खरेदी केली. दोन दिवसांपर्यंत महाराष्ट्रात मध्य प्रदेशपेक्षा जास्त खेरदी होती. पण महाराष्ट्रातील खरेदी केंद्रे हळूहळू बंद होत आहेत. त्यामुळे खरेदीची गती कमी झाली.
पुढील काळातही हरभरा खरेदी कमी होत जाणार आहे. त्यामुळे नाफेडची खरेदी किती टनांपर्यंत पोचते हे पाहावे लागेल. पण नाफेडची खेरदी वाढूनही खुल्या बाजाराला आधार मिळाला नाही. प्रक्रिया उद्योग गरजेप्रमाणे खरेदी करत आहेत.
तर बाजारात आवकही कमी होत असल्याचे व्यापारी सांगत आहेत. पण सरकारच्या दबावामुळे बाजार पुढील काही काळ दबावात राहू शकतो, असा अंदाज व्यापारी आणि प्रक्रिया उद्योगांकडून व्यक्त केला जात आहे.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
