फ्यूचर्स किमती ः सप्ताह २ ते ८ सप्टेंबर २०२३
१ जून ते ८ सप्टेंबर २०२३ या कालावधीत देशातील मॉन्सूनचा पाऊस सरासरीपेक्षा ११ टक्क्यांनी कमी भरला आहे. बंगाल, झारखंड, बिहार, पूर्व उत्तर प्रदेश, मध्य महाराष्ट्र, मराठवाडा, कर्नाटक व केरळ येथे तो सरासरीपेक्षा २० टक्क्यांहून कमी झाला आहे.
याशिवाय ओडिशा, मध्य प्रदेश, गुजरात, आंध्र प्रदेश व तमिळनाडू येथेही पाऊस समाधानकारक नाही. महाराष्ट्रात मध्य महाराष्ट्र (२५ टक्के), मराठवाडा (२३ टक्के) व विदर्भ (१३ टक्के) अशी पावसाची तूट आहे.
या दुष्काळजन्य परिस्थितीचा शेतीमाल उत्पादनावर व पाण्याच्या उपलब्धतेवर परिणाम होईल. त्यामुळे शेतीमालाच्या किमती चढ्या आहेत. पुढील सात दिवसांत ओडिशा, कोकण व केरळ येथे पाऊस होण्याचा अंदाज आहे.
हळदीच्या किमतीतील तेजी आता कमी होऊ लागली आहे. टोमॅटोची आवक वाढल्याने किमती घसरल्या आहेत. मुगाच्या किमतीत वाढ दिसून आली. ८ सप्टेंबर रोजी संपलेल्या सप्ताहात किमतींमधील सविस्तर चढ-उतार खालीलप्रमाणे आहेत.
कापूस/कपाशी
MCX मधील कापसाचे स्पॉट (राजकोट, यवतमाळ, जालना) भाव गेल्या सप्ताहात १.८ टक्क्याने वाढून रु. ६१,१६० वर गेले होते. या सप्ताहात ते ०.२ टक्क्याने वाढून रु. ६१,२६० वर आले आहेत. नोव्हेंबर फ्यूचर्स भाव १.७ टक्क्याने घसरून रु. ६०,३८० वर आले आहेत. जानेवारी फ्यूचर्स रु. ६१,०४० वर आले आहेत. ते सध्याच्या स्पॉट भावापेक्षा ०.४ टक्क्याने कमी आहेत. कापसाचे भाव वाढण्याचा कल आहे. आवक कमी होत आहे.
कपाशीचे स्पॉट भाव (प्रति २० किलो) गेल्या सप्ताहात रु. १,५४८ वर आले होते. या सप्ताहात ते ०.८ टक्क्याने घसरून रु. १,५३६ वर आले आहेत. नोव्हेंबर फ्यूचर्स रु. १,५२० वर आले आहेत. एप्रिल फ्यूचर्स रु. १,५५२ वर आहेत. ते स्पॉट भावापेक्षा १ टक्क्याने अधिक आहेत. कापसाचा हमीभाव मध्यम धाग्यासाठी प्रति क्विंटल रु. ६,६२० व लांब धाग्यासाठी रु. ७,०२० आहे. कपाशीचे फ्यूचर्स भाव हमीभावापेक्षा अधिक आहेत.
मका
NCDEX मधील रब्बी मक्याच्या स्पॉट किमती (गुलाब बाग) गेल्या सप्ताहात रु. २,०८५ वर आल्या होत्या. या सप्ताहात त्या ०.२ टक्क्याने घसरून रु. २,०८० वर आल्या आहेत. फ्यूचर्स (ऑक्टोबर डिलिव्हरी) किमती रु. २,०९७ वर आल्या आहेत. डिसेंबर फ्यूचर्स किमती रु. २,१२२ वर आहेत. स्पॉट भावापेक्षा त्या २.६ टक्क्यांनी अधिक आहेत. मक्याचा हमीभाव रु. २,०९० आहे.
हळद
NCDEX मधील हळदीच्या स्पॉट (निजामाबाद, सांगली) किमती गेल्या सप्ताहात २.६ टक्क्यांनी घसरून रु. १४,२४८ वर आल्या होत्या. या सप्ताहात त्या पुन्हा १.५ टक्क्याने घसरून रु. १४,०३३ वर आल्या आहेत. ऑक्टोबर फ्यूचर्स किमतीसुद्धा २ टक्क्यांनी घसरून रु. १४,८०८ वर आल्या आहेत. डिसेंबर फ्यूचर्स किमती रु. १५,५२६ वर आल्या आहेत. स्पॉट भावापेक्षा त्या १० टक्क्यांनी जास्त आहेत. हळदीमधील तेजी कमी होण्याची लक्षणे दिसू लागली आहेत.
हरभरा
हरभऱ्याच्या स्पॉट (अकोला) किमती गेल्या सप्ताहात ८.४ टक्क्यांनी वाढून रु. ६,१५० वर आल्या होत्या. या सप्ताहात त्या ०.४ टक्क्याने घसरून रु. ६,१२५ वर आल्या आहेत. हरभऱ्याचा हमीभाव रु. ५,३३५ आहे. गेल्या तीन महिन्यांत हरभऱ्याचे भाव सातत्याने वाढत आहेत.
मूग
मुगाची स्पॉट किमत (मेरटा) गेल्या सप्ताहात ६ टक्क्यांनी वाढून रु. ८,८०० वर आली होती. या सप्ताहात ती पुन्हा ७.७ टक्क्यांनी वाढून रु. ९,४७५ वर आली आहे. मुगाची आवक गेल्या काही सप्ताहांत वाढत होती; आता ती घसरू लागली आहे. गेल्या हंगामापेक्षा या वर्षी ती कमी झाली आहे. मुगाचा हमीभाव रु. ८,५५८ आहे.
सोयाबीन
गेल्या सप्ताहात सोयाबीनची स्पॉट किमत (अकोला) रु. ५,१२५ वर आली होती. या सप्ताहात ती १ टक्क्याने घसरून रु. ५,०७५ वर आली आहे. सोयाबीनचा हमीभाव रु. ४,६०० आहे.
तूर
तुरीची स्पॉट किमत (अकोला) गेल्या सप्ताहात ३.२ टक्क्यांनी वाढून रु. १०,३५९ वर आली होती. या सप्ताहात ती किंचित (०.३ टक्क्याने वाढून) घसरून रु. १०,३२६ वर आली आहे. तुरीचा हमीभाव रु. ७,००० आहे. तुरीच्या भावात तेजी आहे. आवक कमी आहे. यंदा तुरीचे उत्पादन घटण्याची शक्यता आहे.
(सर्व किमती प्रति क्विंटल; कापसाची किंमत प्रति खंडी (३५५.५६ किलो); कपाशीची किंमत प्रति २० किलो.)
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
