Team Agrowon
महाराष्ट्रात गोगलगायीचा प्रादुर्भाव मागच्या दोन वर्षात अचानक वाढलेला दिसतोय.
महाराष्ट्रात गोगलगायीचा प्रादुर्भाव मागच्या दोन वर्षात अचानक वाढलेला दिसतोय. सततचं ढगाळ, दमट, पावसाळी वातावरण गोगलगायीच्या प्रजननासाठी अनुकूल असल्याने प्रजनन जलद होऊन गोगलगायींची संख्या अनेक पटीने वाढते.
त्यातच गेल्या दोन, तीन वर्षांत म्हणजेच २०२० आणि २०२१ या वर्षात पावसाचा कालावधी लांबल्यानं शंखी गोगलगायीची दुसरी पिढीही सक्रिय झाली.
पुढील डिसेंबर-जानेवारी महिन्यात अति थंड व अति उष्ण वातावरणात त्या सुप्तावस्थेत राहिल्या. त्यानंतर २०२२ च्या खरीप हंगामात लवकर पाऊस पडला.
मागील वर्षीच्या सुप्तावस्थेतील दोन्हीही पिढ्या खरीप २०२२ मध्ये सक्रिय झाल्या.
या काळात लातूर जिल्ह्यातील औसा, निलंगा व रेणापूर, धाराशिव जिल्ह्यातील धाराशिव, तुळजापूर, कळंब व उमरगा व बीड जिल्ह्यातील अंबाजोगाई, परळी व केज तालुक्यातील काही गावात खरीप पिकांच्या पेरणीनंतर कमी-अधिक पाऊस सतत राहिला. त्यामुळे गोगलगायीच्या नियंत्रणाकडे दुर्लक्ष झाल्याने रोपावस्थेतील पिकांचे मोठे नुकसान झाले.
शंखी गोगलगायी या उभयलिंगी असतात. म्हणजेच एकाच आकाराच्या दोन गोगलगायींचं मिलन झाल्यास दोन्ही गोगलगायी अंडी देतात. एक मोठी आणि दुसरी लहान गोगलगाय यांचे मिलन झाल्यास फक्त मोठी गोगलगाय अंडी देते. यामुळे त्यांची संख्या झपाट्याने वाढते.