sandeep Shirguppe
सध्या टोमॅटो, मिरचीला चांगला भाव मिळत असल्याने उत्पादक शेतकऱ्यांना चांगला फायदा होत आहे. दरम्यान कोल्हापूर जिल्ह्यातील एका शेतकऱ्याने टोमॅटोचे उत्पादन घेतले आहे.
परंतु काही समाजकंटकांनी शेतकरी दिनकर चव्हाण यांच्या शेतातील तोडणीसाठी आलेल्या टोमॅटो, कारले व मिरची तसेच संजय खोत यांच्या शेतातील वरणा पीक उद्धवस्त केले आहे.
दिनकर चव्हाण यांचे या सगळ्यात तब्बल ३० लाखांच्या आसपास नुकसान झाले आहे. या प्रकारामुळे शेतकरी दिनकर चव्हाण यांना अश्रू अनावर झाले होते.
यावेळी चव्हाण कुटुंबियांशी चर्चा केली असता आम्ही काबाड कष्ट करून दिड एकरमध्ये २० गुंठे टोमॅटो, २० गुंठे मिरची तर २० गुंठ्यात कारल्याचे पीक घेतले होते. यामध्ये अंदाजे त्यांना ३० लाखांचा नफा अपेक्षीत होता.
अशातच लांबलेला पाऊस, पाण्याची कमतरतेमुळे चव्हाण कुटुंबीयांनी रोपे जगवण्यासाठी भांड्यातून पाणी घालून हे पिक वाढवले होते.
चव्हाण यांचे सुमारे १५ जणांचे कुटुंब पूर्णपणे शेतीवरच अवलंबून आहे. तर संजय खोत यांचाही संसार शेतीवर अवलंबून आहे. मात्र या शेतकऱ्यानी जीवापाड जपलेले हे पीक रात्री समाजकंटकांनी उपटून टाकून त्याची नासधूस केली.
दरम्यान या शेतीच्या आधारावर चव्हाण यांनी घराचे बांधकाम काढले होते अर्धवट राहिलेले काम पूर्ण करण्यासाठी त्यांनी आपल्या शेतीत विविध पीके घेत आर्थिक उत्पन्न वाढणव्याचा प्रयत्न होता.
याबाबत त्यांनी पोलिसात तक्रार दाखल केली आहे. परंतु पोलिसांनी समाधानकारक तपास न केल्याने चव्हाण कुटुंबियांनी नाराजी व्यक्त केली.
याचबरोबर कोल्हापूर जिल्ह्यात एवढी मोठी घटना घडलेली असूनही तालुका किंवा जिल्हा कृषी अधिकाऱ्यांनी दखल न घेतल्याने गावकऱ्यांनी संताप व्यक्त केला.
याबाबत माहिती मिळताच, आमदार ऋतुराज पाटील, माजी जिल्हा परिषद अध्यक्षा शौमिका महाडिक, यांनी ही घटनास्थळावर येत पाहणी केली.