Team Agrowon
हिरवळीसाठी सुपीक, सपाट आणि पाण्याचा उत्तम निचरा होणारी हलकी ते मध्यम जमीन निवडावी. जमीन तशी नसेल तर तयार करून घ्यावी. भरपूर सूर्यप्रकाश आणि मोकळी हवा मिळणे आवश्यक आहे.
सिलेक्शन-१, डायमंड आणि मेक्सिकन या जातींची निवड करावी.
लागवडीसाठी जमीन तयार करण्याचे काम शक्यतोवर पावसाळा सुरू होण्यापूर्वी करावे लागते. प्रत्यक्ष लागवड जोराचा पाऊस संपल्यानंतर परंतु कडक थंडी पडण्यापूर्वी पूर्ण करावी.
लागवडीचे क्षेत्र प्रथम मोजून निवडलेली जमीन ५० सेंमी खोल खोदून त्यातील माती बाहेर काढावी. त्यानंतर तळातील २० ते २५ सेंमी भाग दगड, विटांच्या तुकड्यांनी भरून घ्यावा.
खोदून काढलेल्या मातीत पोयट्याची माती मिसळून पुन्हा २० ते २५ सेंमीचा दुसरा थर द्यावा. थरासाठी एकदम काळी चिकण किंवा चुनखडीयुक्त माती वापरु नये.
प्रत्येक थर तयार करतेवेळी पाणी शिंपडल्याने मातीचे थर चांगले बसतात. पाऊस पडल्यानंतर किंवा पाणी दिल्यानंतर हिरवळीसाठी तयार केलेल्या जागेवरील उगवलेले तण मुळासकट उपटून टाकावे. हिरवळीच्या बाजूला वाट ठेवावी.
हिरवळ लागवड काशा, बिया, टर्फिग आणि टर्फ प्लास्टरींग पासून करण्यात येते. साधारणपणे १०० चौरस फूट क्षेत्रासाठी १० किलो हिरवळ लागते.