Team Agrowon
देशात निर्यातीच्या केळीची आवक वाढली आहे. सध्या रोज ५० ते ५२ कंटेनर (एक कंटेनर २० टन क्षमता) केळीची निर्यात आखातासह इतर भागात होत आहे.
निर्यातीच्या केळीला २३०० ते २५०० रुपये प्रतिक्विंटलचा दर आहे. राज्यातून सध्या १८ ते २० कंटेनर केळीची पाठवणूक परदेशात होत आहे. सर्वाधिक निर्यात सोलापुरातून होत आहे.
त्यापाठोपाठ आंध्र प्रदेशातून रोज १८ ते १९ कंटेनर केळीची निर्यात होत आहे. तसेच अन्य दाक्षिणात्य भागांतूनही ११ ते १२ कंटेनर केळी आखातात पाठविली जात आहे.
राज्यातील दक्षिण, पश्चिम भाग व दाक्षिणात्य राज्यांत थंडीच्या कालावधीत केळी पिकात चिलिंग इंज्युरी (थंडीचा फटका) होत नाही.
यामुळे या भागात थंडीच्या कालावधीतही केळीची लागवड केली जाते. परिणामी या भागात केळीची आवक या कालावधीत बऱ्यापैकी आहे, असे केळी उत्पादक शेतकरी व व्यापाऱ्यांनी सांगितले.
खानदेशात थंडीमुळे नोव्हेंबर, डिसेंबरमध्ये केळीची लागवड टाळली जाते. यामुळे या काळात केळीची आवक अल्प असते.