Team Agrowon
पुणे जिल्ह्यातल्या इंदापूर तालुक्यातील म्हसोबावाडी या गावाची रेशीम उत्पादकांचं गाव अशी ओळख निर्माण झाली आहे.
रेशीम शेतीसाठी मिळणारा अनुदानाचा आधार योग्य मार्गदर्शन आणि बाजरपेठेची उपलब्धता यामुळे गावातील रेशीम उत्पादकांचे अर्थकारण सुधारले आहे.
पूर्वी गावात ऊस, कांदा पिकांसह पारंपरिक शेती केली जायची. मात्र, गावातील काही मोजके शेतकरी शाश्‍वत उत्पन्न देणाऱ्या शेतीपूरक व्यवसायाकडे वळाले.
अनेक पर्यायांमधून शोधाअंती त्यांना रेशीम शेतीचा पर्याय जवळचा वाटला. सुरवातीच्या शेतकऱ्यांचे अनुभव, बाजारपेठा या बाबी अभ्यासून मग हळूहळू गावातील अन्य शेतकरीही याकडे वळाले.
पाच वर्षापूर्वी गावात पाच ते सहाच रेशीम उत्पादक होते. गेल्यावर्षी ही संख्या ३६ वर पोचली आहे. तर ७३ नव्या शेतकऱ्यांनी नोंदणी केली आहे.
तालुक्यात ३११ एकर क्षेत्रावर तुती लागवड असून त्यापैकी ३६ एकर क्षेत्र म्हसोबावाडीत आहे.
जिल्हा रेशीम कार्यालयाच्या माध्यमातून शेतकऱ्यांना व्यवसाय उभारणे शक्य झाले. शेताजवळच तुती क्षेत्रानुसार विविध आकाराचे शेड उभारले.
सुरवातीला पुण्यातील काही व्यापारी गावातील रेशीम कोषांची खरेदी करायचे. मागील वर्षापासून जिल्हा रेशीम कार्यालय व बारामती कृषी उत्पन्न बाजार समिती यांच्या पुढाकाराने ई नाम पद्धतीने रेशीम खरेदी विक्री बाजाराची सुविधा सुरू झाली.