Team Agrowon
शरीरातील क्षारांचे प्रमाण भरून काढण्यासाठी लोणचे महत्त्वाची भूमिका पार पाडते. विविध प्रकारची फळे, भाजीपाला, मसाले इ. लोणच्यातील अविभाज्य घटक असतात.
लोणच्यामध्ये मीठ आणि शिरका वापरला जातो. यामध्ये सूक्ष्मजीवांच्या साहाय्याने मूळ फळ किंवा भाज्यांचे नियंत्रित प्रमाणात किण्वन केले जाते. त्यामुळे लोणच्याला एक विशिष्ट चव आणि स्वाद असतो.
भारतामध्ये विविध प्रकारचे मसाले उपलब्ध आहेत. विविध प्रकारची फळे आणि भाजीपाला प्रत्येक हंगामात उपलब्ध असतो, त्यामुळे विविध प्रकारची लोणची फळे आणि भाज्यांच्या हंगामानुसार तयार करतात.
विविध राज्याच्या आवडी निवडीनुसार आणि चवीनुसार लोणचे तयार करण्याच्या पद्धती आहेत.
उत्तर भारतामध्ये मुळा, गाजर, फ्लॉवर, आले आणि मिरची लोणचे तयार करतात. परिरक्षक म्हणून मोहरी तेलाचा वापर करतात.
दक्षिण भारतात कोथिंबीर, लसूण, आल्याचे लोणचे लोकप्रिय आहे. लोणच्यामध्ये तिळाचे तेल वापरले जाते.
महाराष्ट्रात आंबा, मिरची, मिश्र लोणचे, लिंबू, आवळा, करवंद इत्यादी लोकप्रिय प्रकार आहेत. यामध्ये शेंगदाण्याच्या तेलाचा वापर केला जातो.