Anuradha Vipat
महागडे फेसवॉश वापरण्यापेक्षा तुमच्या दैनंदिन जीवनशैलीतील आणि आहारातील चांगल्या सवयीच त्वचेवर नैसर्गिक आणि कायमस्वरूपी चमक आणतात.
केवळ बाहेरून चेहरा स्वच्छ केल्याने त्वचेची तात्पुरती धूळ निघून जाते, पण खरी त्वचा आतून निरोगी राहण्यासाठी योग्य सवयींची गरज असते.
दिवसभरात किमान ७ ते ८ ग्लास पाणी प्यायल्याने शरीरातील विषारी घटक बाहेर पडतात. यामुळे त्वचा आतून हायड्रेट राहते आणि कोरडेपणा व सुरकुत्या कमी होतात.
आहारात हिरव्या पालेभाज्या, ताजी फळे, सुकामेवा आणि ओमेगा-३ युक्त पदार्थांचा समावेश केल्यास त्वचा नैसर्गिकरीत्या उजळते.
रात्री झोपताना आपल्या त्वचेच्या पेशींची दुरुस्ती होत असते. अपुऱ्या झोपेमुळे डोळ्यांखाली काळी वर्तुळे येतात आणि चेहरा निस्तेज दिसतो.
केवळ उन्हात जातानाच नव्हे, तर घरात असताना किंवा ढगाळ वातावरणातही ब्रॉड-स्पेक्ट्रम सनस्क्रीन लावण्याची सवय लावा. यामुळे सूर्याच्या अतिनील किरणांपासून होणारे टॅनिंग आणि अकाली वृद्धत्व टळते.
आपल्या हातांवर अनेक प्रकारचे जंतू आणि धूळ असते. चेहऱ्याला सारखा हात लावल्याने हे जंतू त्वचेवर पसरतात आणि मुरुमांची समस्या वाढते.