sandeep Shirguppe
सध्या कोकणात भात लावणीच्या कामांना वेग आला आहे. दरम्यान राज्याचे मुख्यमंत्री एकनाथ शिंदे हे साताऱ्यातील आपल्या शेतीचे काम करताना आपण कित्येक वेळा पाहिले असेल.
आता मुख्यमंत्री शिंदे यांच्या पावलावर पाऊल ठेवून पुत्र खासदार श्रीकांत शिंदे यांनी शेतीची कामे केली आहेत. हे दोन दिवस भात लावणीत मग्न झाले आहेत.
दरे तर्फ तांब (ता. महाबळेश्वर) येथे श्रीकांत शिंदे शेतीत भात लावणी करताना दिसून आले. आपल्या शेतात त्यांनी मशिनच्या सहाय्याने चिखल केला.
याचबरोबर त्यांनी भाताचा तरवा काढण्यासही मदत केली. चिखल करण्यासही ते मदत करताना दिसत आहेत. खासदार शिंदे यांच्यासोबत गावकऱ्यांनीही त्यांना मदतीचा हात दिला.
श्रीकांत शिंदे हे वारंवार आपल्या शेतात येत झाडे लावणे, स्ट्रॉबेरी लागवड, भात शेती यांची कामे अत्यंत आवडीने करत असल्याचे पहायला मिळते.
मुख्यमंत्री एकनाथ शिंदे यांच्यापाठोपाठ श्रीकांत शिंदेही मोठ्या उत्साहाने शेतीचे कामे करताना दिसल्याने त्यांच्या फोटोची जोरदार चर्चा होत आहे.
श्रीकांत शिंदे म्हणाले की, भातशेतीत मळ्यात वाढणारी भातरोपं, जिवंत बहरणारा हिरवा डोंगर आणि पावसाचा कणाकणात रुजण्याचा सोहळा हे सगळं पाहणे म्हणजे एक ऊर्जा असते.
शेतीत राबताना त्या बळीराजाच्या कष्टाची जाणीव आपल्या हातात असलेल्या जबाबदारीची जाणीव देते. आज भाताची लावणी करताना तीच जाणीव प्रत्येक रोपात होती असे खा. श्रीकांत शिंदे यांनी म्हटले आहे.
निसर्गाचं हे देणं जगण्याचा भाग असणं यापेक्षा वेगळं भाग्य नाही.असे काम केल्यावर पुढील कामात आम्हाला नक्की ऊर्जा मिळते असेही ते म्हणाले.
गुरेवासरे त्यांचा मुकेपणा, त्यांची माया हे सगळे अबोल असते पण तरीही ते खूप बोलके असते. हे गावपण अनुभवण्याचा एक वेगळाच आनंद आहे.