Team Agrowon
सुकेणे (ता. निफाड) येथील शेतकरी श्यामराव मोगल यांनी मित्राच्या मुलीच्या लग्नात देशी गाय, विषमुक्त अन्न-धान्यांसह ११ प्रकारचा भाजीपाला, ५ किलो गूळ, देशी गाईचे तूप, पिवळी व लाल जास्वंद, चाफा, प्राजक्त अशी फुलझाडे, तुळस यांसह ३१ प्रकारची विविध देशी झाडे, दगडी जाते, रांजण भेट दिला आहे.
मोगल यांचे मित्र श्याम काठे यांची कन्या ऋतुजा व प्रसाद यांचा लग्नसोहळा नुकताच नाशिक येथे झाला. एकीकडे महागड्या गाड्या, मोटरसायकली तर घरातल्या वस्तू या भेट स्वरूपात देण्याची पद्धत पडत आहे. त्यास मोगल यांनी फाटा दिला.
मांडवात हा आहेर ठेवण्यासाठी त्यांनी ज्वारी व बाजरीच्या कडब्याचा वापर करून आकर्षक दालन बनविले होते.
आहेर पाहण्यासाठी लग्नानिमित्त उपस्थित असलेले सह्याद्री फार्मर प्रोड्यूसर कंपनीचे अध्यक्ष व व्यवस्थापकीय संचालक विलास शिंदे, आमदार सीमा हिरे, माजी आमदार अनिल कदम, माणिकराव बोरस्ते, आंतरराष्ट्रीय धावपटू कविता राऊत, शिवछत्रपती क्रीडा पुरस्कार विजेते डॉ. सुनील मोरे यांनी भेट देत या उपक्रमाचे कौतुक केले.
आजी-आजोबांच्या काळात अशा गोष्टींचा वापर होता. त्यामुळे पूर्वीची पिढी निरोगी आयुष्य व आनंदी जीवन शेतीमातीच्या सान्निध्यात जगली. हाच आदर्श व हीच जीवनशैली पुन्हा रुजावी, यासाठी हा छोटा प्रयत्न होता.
लग्नात वारेमाप खर्च करू नये. त्यातून पैशांची उधळपट्टी आणि काही प्रमाणात कर्जबाजारीपणा थांबेल.