Pune News: राज्यातील काही भागात पावसाची शक्यता कायम आहे. मराठवाडा, विदर्भ, मध्य महाराष्ट्र आणि कोकणातील काही भागात पुढील ५ दिवस पावसाचा अंदाज हवामान विभागाने दिला. तर दुसरीकडे उन्हाचा चटकाही असह्य होत आहे. 

हवामान विभागाने आज मराठवाड्यातील धाराशिव, लातूर, नांदेड, बीड, जालना आणि छत्रपती संभाजीनगर जिल्ह्यात तर मध्य महाराष्ट्रातील सोलापूर, सांगली, नंदूरबार, धुळे आणि जळगाव तसेच कोकणातील सिंधुदूर्ग, रायगड, ठाणे आणि पालघर जिल्ह्यात काही ठिकाणी हलक्या ते मध्यम पावसाचा अंदाज दिला. सिंधुदूर्ग जिल्ह्यात सोमवारी आणि मंगळवारीही पावासाची शक्यता व्यक्त करण्यात आली.

विदर्भातील काही भागात पुढील ४ दिवस पावसाला पोषक हवामान आहे. भंडारा जिल्ह्यात मंगळवारी, चंद्रपूर जिल्ह्यात सोमवार, मंगळवार आणि बुधवारी, गडचिरोली जिल्ह्यात सोमवारी, वर्धा जिल्ह्यात बुधवारी, यवमाळ जिल्ह्यात सोमवारी आणि बुधवारी काही भागात विजा आणि ढगांच्या गडगडाटासह हलक्या ते मध्यम पावसाचा अंदाज आहे.

मराठवाड्यातील धाराशिव, लातूर, नांदेड, जिल्ह्यात रविवार, सोमवार, मंगळवार आणि बुधवारी पावसाची शक्यता आहे. हिंगोली जिल्ह्यात रविवार, सोमवार आणि मंगळवारी, तर बीड जिल्ह्यात रविवारी, परभणी जिल्ह्यात रविवारी आणि सोमवारी, जालना जिल्ह्यात रविवारी, छत्रपती संभाजीनगरमध्ये रविवारी पावसाचा अंदाज आहे.

मध्य महाराष्ट्रातील सोलापूर, सांगली जिल्ह्यात काही ठिकाणी रविवार ते बुधवार पावसाची शक्यता आहे. सातारा जिल्ह्यात मंगळवारी, कोल्हापूर जिल्ह्यात सोमवार, मंगळवार आणि बुधवारी, अहिल्यानगर आणि जळगाव जिल्ह्यात रविवारी काही ठिकाणी हलक्या पावसाचा अंदाज हवामान विभागाने दिला. 

राज्यात उन्हाचा चटकाही कायम आहे. बहुतांशी भागात तापमानाचा पारा ४० अंशाच्या पार पोचला आहे. विदर्भ आणि खानदेशात उन्हाचा चटका असह्य होत आहे. विदर्भातील अकोला येथे राज्यातील सर्वाधिक ४२.८ अंश सेल्सिअस तापमानाची नोंद झाली होती.