सध्या उन्हाचा चटका वाढल्याने काकडीला चांगली मागणी आहे. राज्याच्या वेगवेगळ्या भागात काकडीला सध्या १ हजार १०० ते १ हजार ८०० रुपयांच्या दरम्यान भाव मिळत आहे. बाजारातील चिंचेची आवक मात्र मर्यादीत दिसत आहे. तर चिंचेला बाजारात सध्या मागणी दिसून येत आहे. चिंच उत्पादनाला यंदा बदलत्या वातावरणाचा फटका बसल्याचे शेतकरी सांगत आहेत. त्यामुळे चिंचेला सध्या ९ हजार ते १३ हजार रुपये प्रतिक्विंटलच्या दरम्यान भाव मिळत आहे. बाजारातील वाढत्या आवकेबरोबर टोमॅटोच्या दरावरही दबाव वाढत गेला. टोमॅटोच्या भावात मागील तीन आठवड्यांमध्ये मोठी घसरण झाली. तोटा वाढल्याने बाजारातील आवक वाढत असल्याचे व्यापारी सांगत आहेत. टोमॅटोला सध्या बाजारात सरासरी ७०० ते ११०० रुपयांचा भाव मिळत आहे. ज्वारीचे दर मागील दीड महिन्यात क्विंटलमागे किमान ३०० ते ५०० रुपयांनी कमी झाले आहेत. बाजारातील ज्वारीची आवक वाढत आहे. सध्या ज्वारी वाण आणि गुणवत्तेप्रमाणे २३०० ते ३१०० रुपयांच्या दरम्यान विकली जात आहे. कापसाचे भाव मागील दीड महिन्यापासून एकाच भावपातळीच्या दरम्यान दिसत आहे. कापसाची बाजारातील आवक खूपच कमी झाली. मात्र सीसीआयची विक्री सुरुच आहे. याचा दबाव कापूस दरावर येत आहे. सध्या कापसाला सरासरी ७ हजार ४०० ते ७ हजार ८०० रुपयांच्या दरम्यान भाव मिळत आहे.