निफाड, जि. नाशिक : सलग दोन वर्षे कोरोनाचा फटका शेतीला बसलेला असताना यंदा शेतीत आशादायक चित्र निर्माण होईल, अशी अपेक्षा बाळगून असलेल्या बळीराजाची घोर निराशा झाली आहे. सर्वच पीक जोमात असल्याने उत्पन्नही वाढले. मात्र त्याचा उलटा फटका शेतकऱ्यांना बसला आहे. सध्या आवक वाढल्याने शेतीमालाच्या उत्पन्नात सतत घसरण सुरू आहे. अशा स्थितीत शेतकऱ्यांना कुठलाही दिलासा दिला जात नाही. त्यामुळे ‘मायबाप सरकार शेती करावी तरी का आणि कशी?’ असा सवाल शेतकरी हताशपणे सरकारला विचारत आहे.

एकीकडे पाऊस, भांडवल या अडचणी असताना जिल्ह्यातील शेतकऱ्यांनी शेतीमाल पिकविला. मात्र बाजार समित्यांमध्ये सलग पंधरा दिवसांपासून कवडीमोल भावात तो विकला जात आहे. टोमॅटो, सिमला, वांगे, कोबी, फ्लॉवर, कोथिंबीर, शेपू, मेथी, काकडी, कारले, दुधी सगळं काही बेभाव जात आहे. टोमॅटो, सिमला मिरची हा शेतीमाल शेतकऱ्यांनी काबाडकष्ट करत माल पिकवला. मात्र उत्पादन खर्चही निघत नसल्याने अक्षरशः रस्त्यावर फेकून देण्याची वेळ आलेली आहे. टोमॅटोचा अक्षरशः चिखल पाहायला मिळत आहे. 

तोडणी व विक्री परवडत नसल्याने भाजीपाला शेतात तसाच पडून आहे. तो बाजार समितीत विक्रीसाठी आणण्याचा खर्चसुद्धा वसूल होत नाही. टोमॅटो, सिमला मिरची, कारले, दोडके, गिलके, दुधी भोपळा किमान ३० प्रति जाळी भाडे आणि २० तोडणीचा खर्च येतो. विकला जातो अवघा तीस ते चाळीस रुपये दराने. ही विसंगती कशी भरून निघणार हा प्रश्‍न आहे. अशावेळी शेतकऱ्यांसाठी असलेली बाजार हस्तक्षेप योजनाही कुठे दिसत नाही. त्यामुळे शेतकऱ्यांचे दुःख सरकारने समजून घ्यावे, अशी मागणी शेतकरी करत आहेत.

शेती हा आतबट्ट्याचा व्यवसाय बनला आहे. लाखो रुपये शेतीत घालायचे, काबाडकष्ट करायचे आणि उत्पादन खर्चही मिळत नाही. पिकविलेल्या मालाला दोन रुपये किलो भाव मिळाल्याने ढोबळी मिरची उपटून फेकण्याची वेळ आली. - अनिरुद्ध पवार, शेतकरी, दात्याने

उत्पादन खर्च निघणे दुरापास्त झाले. त्यामुळे कुटुंबकबिला कसा चालवावा, असा यक्षप्रश्‍न सर्वसामान्य शेतकऱ्यांना पडला आहे. - छोटूकाका पानगव्हाणे, अध्यक्ष, द्राक्ष संघर्ष समिती, निफाड