Akola News : महाराष्ट्र राज्य कृषी सहायक संघटनेची राज्यस्तरीय आढावा बैठक रविवारी (ता. २२) पुण्यात झाली. या बैठकीत कृषी सहायकांच्या विविध समस्या, प्रलंबित प्रश्नांवर चर्चा झाली. या बाबत कृषी आयुक्तस्तरावर लवकरच पाठपुरावा करण्याबाबत ठरवण्यात आले.

या बैठकीला राज्यातील विविध जिल्ह्यांतून राज्य कार्यकारिणी सदस्य, जिल्हाध्यक्ष, जिल्हा सचिव उपस्थित होते. राज्याचे सरचिटणीस सोमनाथ बाचकर यांची कृषी पर्यवेक्षकपदी पदोन्नती झाल्याबद्दल सत्कार करण्यात आला. आजवर त्यांनी कृषी सहायक संघटनेत आघाडीवर काम केले.

त्यांचे संघटनेसाठीचे योगदान पाहता ही पोकळी कधीही भरून निघणारी नाही, अशा भावना या वेळी अनेकांनी आपल्या मनोगतात मांडल्या. अहिल्यानगरचे जिल्हाध्यक्ष संदीप बोदगे यांचाही पदोन्नतीबद्दल सत्कार करण्यात आला.

या सभेमध्ये संघटनेच्या रिक्त पदांवर नियुक्त्या करण्यात आल्या. राज्य सरचिटणीसपदी महेंद्र गजभिये (नागपूर), सरचिटणीसपदी जय किर्तिमान पाटील (नाशिक), सह कोषाध्यक्षपदी प्रसाद पाटील (रायगड) यांची बिनविरोध निवड करण्यात आली. त्यानंतर कृषी सहायकांच्या विविध अडचणींवर चर्चा झाली.

या वेळी संघटनेचे राज्य अध्यक्ष संदीप केवटे, शरद सुरळकर, वसंत जरीकोटे, उमेश मोहिते, स्वाती झावरे, अंजना सोनवलकर, शांताराम कसबे, प्रवीण ठाकरे, अनिल भोई, प्रशांत दोरगे, स्वप्नील भुजबळ, योगिता माने, भगत, जाधव व इतर पदाधिकारी उपस्थित होते.