Solapur News : उत्तर सोलापूर तालुक्यात खरीप हंगामातील पिकांची सततच्या पावसामुळे खरीप हंगामातील २४ हजार ७७५ हेक्टर क्षेत्रावरील पिकांचे मोठ्या प्रमाणात नुकसान झाले आहे. त्यामुळे उत्तर तालुक्यात शेतकऱ्यात मोठे चिंतेचे वातावरण आहे.

उत्तर सोलापूर तालुक्यात खरीप हंगामात सोयाबीन, तूर, मूग, मटकी, कांदा, मका आदी पिके घेतली जातात. सध्या सोयाबीन, मूग, मटकी आदी पिके काढणीला आली असताना सततच्या पावसाने मात्र पिकांचे नुकसान होत आहे. तसेच जमिनीतील ओल हटत नसल्याने कांद्याचे पीक ही पिवळे पडू लागले आहे.

तूर, उडीद, मूग या पिकांची सरासरीपेक्षा १८२ टक्के पेरणी झाली आहे. भुईमूग, तीळ, सूर्यफूल, सोयाबीन या पिकांची १७ हजार हेक्टर क्षेत्रावर पेरणी झाली आहे. गळीत धान्य पिकांची पेरणीचे क्षेत्र यंदा पाचपटीने वाढले आहे.

यंदा मोठ्या उत्साहात पेरणीची टक्केवारी वाढली असली तरी सततच्या पावसामुळे पिकावर विरजण पडल्याचे चित्र आहे. उत्तर सोलापूर तालुक्यातील रानमसले, बीबीदारफळ, अकोलेकाठी, वडाळा, कळमण, पडसाळी परिसरात रब्बी हंगामात कांदा लागवड मोठ्या प्रमाणात केली जाते. या पार्श्वभूमीवर शेतकऱ्यांनी कांदा पेरणी व लागवड मोठ्या प्रमाणात केली आहे. मात्र पावसामुळे कांदे, सोयाबीन, पिके पिवळी पडून खराब होत आहेत.

७२ तासांच्या आत नुकसानीची करा नोंद

सततच्या पावसामुळे खरीप हंगामातील पिकांचे नुकसान झाले असल्यास संबंधित विमाधारक शेतकऱ्यांनी त्वरित ७२ तासांच्या आत १४४४७ या टोल फ्री क्रमांकवर तक्रार नोंदवावी.

शेळगी मंडलात सर्वाधिक पाऊस

उत्तर तालुक्यात सप्टेंबर महिन्यात सरासरी १७८ मिलिमीटर पाऊस अपेक्षित होता. २५ सप्टेंबरअखेर मंडलनिहाय पडलेला पाऊस पुढीलप्रमाणे ः शेळगी (१६८ मिलिमीटर), तिर्हे (१२५ मिलिमीटर), मार्डी (१०३ मिलिमीटर), वडाळा (१३६ मिलिमीटर), सोलापूर (१४७ मिलिमीटर).