लातूर : राज्यातील सर्वात मोठ्या मुरूड (ता. लातूर) ग्रामपंचायतीच्या निवडणुकीत (Gram Panchayat Election) तिरंगी लढतीतील प्रचाराला वेग आला असतानाच बुधवारी (ता. १४) रात्री भाजपप्रणित विरोधी पॅनेलचे प्रमुख व विद्यमान ग्रामपंचायत सदस्य अमरबापू पुंडलिकराव नाडे (वय ४३) यांचा प्रचार सभेत व्यासपीठावरच मृत्यू झाला.

त्यांच्या पत्नी अमृता या निवडणुकीत सरपंच पदाच्या उमेदवार असून पॅनेलच्या प्रचारासाठी बुधवारी रात्री सार्वजनिक स्टेजवर प्रचार सभेचे आयोजन करण्यात आले होते. पॅनेलप्रमुख म्हणून नाडे यांनी भाषण केले व ते व्यासपीठावरील पत्नी अमृता यांच्या शेजारील खुर्चीत विराजमान झाले.

त्यानंतर थोड्या वेळातच नाडे यांनी मान टाकली. अचानक घडलेल्या या घटनेमुळे सभेत धावपळ सुरू झाली. या घटनेमुळे गावावर शोककळा पसरली. नाडे यांच्यावर गुरुवारी सकाळी त्यांच्या शेतात अंत्यसंस्कार करण्यात आले. या वेळी मोठा जनसमुदाय उपस्थित होता. नाडे यांच्या मागे पत्नी अमृता, एक मुलगा व एक मुलगी असा परिवार आहे.