Konkan Monsoon Update : मॉन्सून सक्रिय असल्याने राज्यात अनेक ठिकाणी जोरदार पावसासह अतिवृष्टी होत आहे. आज (ता. २४) कोकणासह, घाटमाथ्यावर जोरदार पावसाचा 'ऑरेंज अलर्ट' कायम आहे. विदर्भ आणि मराठवाड्यात विजांसह जोरदार पावसाची, उर्वरित राज्यात हलक्या ते मध्यम पावसाची शक्यता हवामान विभागाने वर्तविली आहे.
मॉन्सूनचा आस असलेला कमी दाबाचा पट्टा काहीसा दक्षिणेकडे असून, राजस्थानच्या देस्सा, रतलाम, बेतूल, ब्रह्मपुरी, कंकेर, कलिंगपट्टम पूर्व मध्य बंगालच्या उपसागरापर्यंत विस्तारला आहे. मॉन्सूनच्या आसाचा पश्चिम भाग उत्तरेकडे सरकण्याची शक्यता आहे.
मध्य प्रदेश आणि परिसरावर समुद्र सपाटीपासून ७.६ किलोमीटर उंचीवर चक्राकार वारे वाहत आहेत. महाराष्ट्राच्या मध्य भागातून असलेले पूर्व-पश्चिम वाऱ्यांचे जोडक्षेत्र समुद्र सपाटीपासून ३.१ ते ५.८ किलोमीटर उंचीवर सक्रिय आहे. मंगळवारपर्यंत (ता. २५) बंगालच्या उपसागरात कमी दाब क्षेत्राची निर्मिती होण्याचे संकेत आहेत.
राज्यात सर्वदूर कमी अधिक प्रमाणात पाऊस सुरू आहे. कोकण, घाटमाथ्यासह धरणांच्या पाणलोट क्षेत्रात पावसाची मुसळधार सुरूच आहे. विदर्भातही तुरळक ठिकाणी अतिवृष्टी होत आहे.
आज (ता. २४) कोकणातील पालघर, रायगड, रत्नागिरी, सिंधुदुर्ग, पुणे, सातारा, कोल्हापूरच्या घाटमाथ्यावर जोरदार पावसाचा 'ऑरेंज अलर्ट' कायम आहे. विदर्भासह मराठवाड्यात विजांसह जोरदार पावसाचा इशारा (येलो अलर्ट), उर्वरित राज्यात हलक्या ते मध्यम पावसाचा अंदाज आहे.
जोरदार पावसाचा इशारा (ऑरेंज अलर्ट) :
पालघर, रायगड, रत्नागिरी, सिंधुदुर्ग, पुणे, सातारा, कोल्हापूर.
जोरदार पाऊस / विजांसह पावसाचा इशारा (येलो अलर्ट) :
मुंबई, ठाणे, छत्रपती संभाजी नगर, जालना, परभणी, हिंगोली, नांदेड, लातूर, बुलढाणा, अकोला, अमरावती, वाशीम, यवतमाळ, नागपूर, वर्धा, भंडारा, गोंदिया, चंद्रपूर, गडचिरोली.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
