Sindhudurg Lumpy Skin Disease : सिंधुदुर्गात ३५५ वर जनावरे लम्पी स्कीन बाधीत

Sindhudurg News : सिंधुदुर्ग जिल्ह्यात लम्पी स्कीन या त्वचा आजाराचा प्रादुर्भाव झपाट्याने वाढत असून चार दिवसांत लम्पी स्कीन बाधीत जनावरांच्या संख्येत १०१ ने भर पडली आहे. त्यामुळे सक्रिय जनावरांची संख्या आता ३५५ वर पोहोचली आहे. चार दिवसांत ८ जनावरे दगावली आहेत. पशुसंवर्धन विभागाने लसीकरणाची गती वाढविली असून आतापर्यंत ८७ टक्के लसीकरण पूर्ण केले आहे.

सिंधुदुर्ग जिल्ह्यात लम्पी स्कीनच्या संकटाने पशुपालक हैराण झाले होते. मार्च-एप्रिलमध्ये लम्पी स्कीनचा प्रादुर्भाव काहीसा कमी झाला होता. मे च्या अखेरीपासून लम्पी स्कीनने पुन्हा डोके वर काढले. ११ ऑगस्टपर्यत सक्रिय लम्पी स्कीनबाधीत जनावरांची संख्या २५४ होती. तर दगावलेल्या जनावरांची संख्या २५ होती.

परंतु गेल्या चार दिवसांत आणखी १०१ जनावरे बाधीत झाली आहेत. त्यामुळे लम्पी स्कीनबाधीतांची संख्या आता ३५५ वर पोहोचली आहे. चार दिवसांत आठ जनावरे दगावली असून मृत जनावरांची संख्या ३३ वर पोहोचली आहे. लम्पी स्कीनच्या वाढत्या प्रादुर्भावामुळे पशुपालकांची चिंता वाढली आहे.

पशुसंवर्धन विभागाने लसीकरणची गती वाढविली असून जिल्ह्यात ८७ टक्के लसीकरण पूर्ण केले आहे. उर्वरित लसीकरण येत्या पाच ते सहा दिवसांत पूर्ण होण्याचा अंदाज आहे. जिल्ह्यातील देवगड, वेंगुर्ला, सावंतवाडी आणि कुडाळचा काही भागात लम्पी स्कीन आजाराचा फैलाव झपाट्याने होत आहे. वाढत्या प्रादुर्भावामुळे पशुपालकांमध्ये भीतीचे वातावरण आहे.