Rabi Season : खानदेशात रब्बीसाठी शेती मशागतीला वेग येणार

Jalgaon News : खानदेशात शेतीकामांना मजूरटंचाईचा फटका बसत आहे. परंतु ज्या शेतकऱ्यांनी शेत नापेर ठेवले व उडीद, मुगाचा हंगाम घेऊन क्षेत्र रिकामे केले, त्या शेतकऱ्यांकडून रब्बीची तयारी सुरू असून, पूर्वमशागतीस वेग येईल. त्यासाठी निरभ्र वातावरणाची प्रतीक्षा मात्र आहे.

लहान, अल्पभूधारक शेतकरी पुढे पीक लागवडीचे नियोजन करीत आहेत. खानदेशात कापसाची लागवड अधिक असते. यामुळे कापूस पिकात वेचणी झाल्यानंतर त्याखालील क्षेत्र रिकामे होईल. कापसाखालील क्षेत्र डिसेंबरमध्ये रिकामे होईल. परंतु उडीद, मूग पीक घेतलेले शेतकरी रब्बीची तयारी करीत आहेत.

शेतीच्या मशागतीसाठी पूर्वी बैलजोडीचा उपयोग अधिकचा करायचे. परंतु अलीकडे ट्रॅक्टर व अन्य यंत्रणा आली आहे. या यंत्रणेच्या मदतीने शेतकरी मशागत करून घेत आहेत. परंतु अनेक शेतांत वाफसा नाही. कारण पावसामुळे ओलावा, चिखलाची स्थिती शेतांत आहे. परंतु ऊन तापल्यास शेती मशागतीस वेग येईल.

अनेकांनी मध्यंतरी पाऊस नसताना खोल नांगरणी करून शेत तापू दिले. त्यात आता रोटाव्हेटरने शेत भुसभुशीतही केले आहे. शेत भुसभुशीत करून त्यात केळी, मका, भाजीपाला लागवडीचे नियोजन कृत्रीम जलसाठाधारक शेतकरी करीत आहेत.

जळगाव जिल्ह्यात केळी, रब्बी पिके व अन्य भाजीपाला पिकांच्या लागवडीसाठी अनेक जण गादीवाफे तयार करून घेत आहेत. नंदुरबारात केळी, मिरची, कारली, टोमॅटो व अन्य पिकेही असतात. या पिकांच्या लागवडीची तयारी या भागात झाली आहे.

खानदेशात रब्बीमध्ये हरभरा पेरणी अधिक होईल. कोरडवाहू क्षेत्रातील हरभरा काळ्या कसदार जमिनीच्या भागात अधिक असतो. तसेच दादर ज्वारीची पेरणीही होईल. यामुळे शेतकरी मशागतीच्या नियोजनात आहेत. दसरा सणापूर्वी पेरणीचे नियोजन अनेक शेतकऱ्यांनी केले आहे. यामुळे पीक जोमात येईल व क्षेत्र पुढे लवकर रिकामे होईल, असे शेतकऱ्यांचे म्हणणे आहे.

पावसामुळे उशिरा लागवडीचे नियोजन

खानदेशात रब्बी पिकांसह केळी, मिरची आदी पिकांची आगाप लागवड केली जात होती. परंतु पाऊस यंदा अधिक आहे. त्यात पुढे आणखी पाऊस येईल, असे संकेतही आहेत. यामुळे शेतकरी सध्या उघडीप व नीरभ्र वातावरणाची प्रतीक्षा करीत आहेत. अनेकांनी गादीवाफ्यांवर मिरची व अन्य पिकांसाठी पॉली मल्चींगदेखील आणले आहे. ऑक्टोबरमध्ये भाजीपाला व अन्य पिकांची लागवड गती घेईल, असे संकेत आहेत.