Crop Insurance : आठवडाभरात उर्वरित पीकविमा न मिळाल्यास पुन्हा आक्रमक आंदोलन

Buldana News : जिल्ह्यातील ३० ते ४० हजार शेतकऱ्यांना अद्याप पीकविमा (Crop Insurance) मिळालेला नाही. नामंजूर असलेल्या शेतकऱ्यांनाही कंपनीने विमा देणार असे म्हटले होते. परंतु प्रत्यक्षात त्यांना अद्याप पीकविमा मिळाला नाही. अनेक शेतकऱ्यांना तफावतीची रक्कमही मिळाली नाही.

त्यामुळे या शेतकऱ्यांना आठवडाभरात पीकविमा न दिल्यास पुन्हा आक्रमक आंदोलन करण्याचा इशारा रविकांत तुपकर (Ravikant Tupkar) यांनी दिला.

जिल्ह्यातील उर्वरित पीकविम्यासाठी त्यांनी मंगळवारी (ता.१४) जिल्हा अधीक्षक कृषी अधिकारी संतोष डाबरे यांची भेट घेतली. आंदोलनांमुळे आतापर्यंत जिल्ह्यातील २ लाख १ हजार ६११ शेतकऱ्यांना १५८ कोटी ९८ लाख ६६ हजार ५२२ रुपये मिळाले आहेत.

परंतु अद्याप पीकवीमा मंजूर असलेल्या ३० ते ४० हजार शेतकऱ्यांच्या खात्यावर पीकविमा जमा झालेला नाही. २८ नोव्हेंबर २०२२ रोजी जिल्हा कृषी अधिक्षकांच्या दालनात केलेल्या आंदोलनानंतर नामंजूर असलेल्या शेतकऱ्यांनाही पीकविमा देऊ असे कंपनीने लेखी दिले होते.

त्यानुसार नामंजूर असलेले शेतकरीही वंचित आहेत. अनेक शेतकऱ्यांना पिकविम्यापोटी अत्यल्प रक्कम मिळाली आहे. जिल्ह्यात ७ हजार ५१३ शेतकऱ्यांना एक हजार पेक्षा कमी पीकविमा मिळाला आहे. अनेकांना प्रीमिअम पेक्षाही कमी रक्कम मिळाली.

त्या शेतकऱ्यांना वाढीव मोबदला मिळावा यासाठी स्वाभिमानी संघटनेच्या कार्यकर्त्यांनी चिखली व मेहकर तालुका कृषी अधिकारी यांच्या दालनात आंदोलन केल्यानंतर तफावत अहवाल तयार करण्यात आले.

चिखली तालुक्यातील तफावत अहवालानुसार अत्यल्प रक्कम मिळालेल्या १६ हजार ६९२ शेतकऱ्यांना तफावतीची ४ कोटी ७२ लाख ८२१ रुपये रक्कम मिळणे गरजेचे आहे. अशीच परिस्थिती जिल्ह्यातील सर्वच तालुक्यात आहे.

आठ दिवसांत हा पीकविमा जमा न झाल्यास पुन्हा तीव्र आंदोलन करण्याचा इशारा तुपकर यांनी दिला आहे. जिल्हा कृषी अधीक्षक डाबरे यांनी याची दखल घेत तातडीने कंपनीला पत्र पाठवले असून २० मार्चपर्यंत उर्वरित शेतकऱ्यांना पीकविमा जमा करण्याच्या सूचना दिल्या आहेत.