Jeera Price: दिवाळीपर्यंत जिऱ्याचे भाव आणखी वाढणार? लागवड दरातील तेजीमुळे दुप्पट

Jeera Market Rate : निर्यातीसाठी मोठी मागणी असल्याचाही फायदा जिरा भावाला मिळला. मात्र भाव तेजीत असल्याने जिऱ्याची लागवड जवळपास दुप्पट झाली. यामुळे पुढील हंगामात जिऱ्यातील तेजी टिकेल की नाही, याबाबत शंका उपस्थित केली जात आहे.

मागील हंगामात घटलेले उत्पादन आणि निर्यातीला असलेली मागणी, यामुळे जिऱ्याच्या भावात चांगली तेजी आली. जिऱ्याच्या भावात चालू हंगामात सुरुवातीपासूनच वाढ होत गेली. मार्च महिन्यातील अवकाळी पाऊस आणि एप्रिल महिन्यातील उष्णतेमुळे जिरा पिकाचे नुकसान झाले. गुजरात आणि राजस्थान जिरा उत्पादनाचे हब आहे. या दोन्ही राज्यांमध्ये पिकाचे नुकसान झाले होते.

जानेवारीत आंतरराष्ट्रीय मसाले परिषदेत भारतातील जिरा उत्पादन गेल्यावर्षीच्या ४ लाख १४ हजार टनांवरून यंदा ३ लाख ८८ हजार टनांवर स्थिरावण्याची शक्यता व्यक्त केली गेली. तर जागतिक जिरा उत्पादन ४ लाख टनांवर स्थिरावेल, असाही अंदाज व्यक्त केला गेला. मागील हंगामात जिरा उत्पादन ४ लाख ३५ हजार टनांवर उत्पादन झाले होते. यंदा जागतिक बाजारात भारतातून जिऱ्याचा पुरवठा ७ टक्क्यांनी कमी राहण्याचा अंदाज आहे. गुजरातमधील जिरा उत्पादन जवळपास ९.३ टक्क्यांनी कमी झाले. यंदा गुजरातमधील उत्पादन २ लाख टनांवर स्थिरावण्याची शक्यता आहे.

भारताबरोबरच सिरिया आणि चीनमधूनही जिरा निर्यात कमी झाली. या दोन्ही देशांमध्येही उत्पादनाला फटका बसला. यामुळे आंतरराष्ट्रीय बाजारात जिऱ्याचे भाव तेजीत आले. परिणामी भारतातून जिरा निर्यात वाढली. भारतातून एप्रिल आणि मे महिन्यात जिरा निर्यात ६८ टक्क्यांनी वाढली. मात्र निर्यातीचे मूल्य दुप्पट झाले.

भावात आणखी वाढ होणार
जिऱ्याला सध्या बाजार समित्यांमध्ये ५७ हजार ते ५८ हजार रुपये प्रतिक्विंटलचा भाव मिळत आहे. या भावात दिवाळीपर्यंत २ ते ३ हजार रुपयांची वाढ होऊ शकते. लागवड सध्या दुप्पट दिसत आहे. त्यामुळे दिवाळीनंतर बाजाराची दिशा काय राहील, हे सांगणे कठीण आहे. तसेच नफावसुलीसाठी जिऱ्याची विक्री वाढू शकते. यामुळे दरात चढ उतारही दिसू शकतात.