Tur Sowing : तुरीचा पेरा ९ टक्क्यांनी पिछाडीवर

Tur Crop : पुणे ः कडधान्य उत्पादनात महाराष्ट्र देशात अग्रेसर आहे. तर राज्यात कडधान्यांमध्ये तूर हे महत्त्वाचे पीक आहे. राज्यात ३१ जुलैपर्यंत कडधान्यांचा पेरा तब्बल २१.४६ टक्क्यांनी पिछाडीवर आहे. त्यात तुरीच्या लागवडीतील पिछाडी ९ टक्के आहे. सर्वाधिक घट मूग आणि उडदाच्या लागवडीत दिसते.

राज्यात कडधान्यांखालील सरासरी क्षेत्र २१ लाख ३८ हजार हेक्टर क्षेत्र आहे. पण मागील हंगामात केवळ १८ लाख हेक्टरवर खरिपाची पेरणी झाली होती. तर चालू खरिपात आतापर्यंत म्हणजेच ३१ जुलैपर्यंत १४ लाख हेक्टरवर कडधान्यांचा पेरा झाला. खरिपातील कडधान्य पेरणी आतापर्यंत २१.४६ टक्क्यांनी पिछाडीवर आहे.

कडधान्यांमध्ये सर्वात जास्त घट मुगामध्ये दिसते. मागील तीन ते चार हंगामांमध्ये ऐन मूग काढणीच्या काळात पावसाने पिकाला दणका दिला. यामुळे शेतकऱ्यांनी मुगाची लागवड कमी केली आहे. गेल्या हंगामात राज्यात मुगाखाली जवळपास २ लाख ७० हजार हेक्टर क्षेत्र होते. त्यात यंदा जवळपास ४४ टक्क्यांनी घट होऊन लागवड दीड लाख हेक्टरवर स्थिरावली.

उडदाची लागवडही ४३ टक्क्यांनी घटली आहे. राज्यात मागील खरिपात ३ लाख ४४ हजार हेक्टरवर उडदाची लागवड झाली होती. पण आतापर्यंत केवळ एक लाख ९६ हजार हेक्टरपर्यंत लागवड पोचली. इतर कडधान्यांचा पेराही ३२ टक्क्यांनी घटला. यंदा सर्वच कडधान्याची पेरणी कमी झालेली दिसते. यामागे मुख्य कारण म्हणजे जून महिन्यात पावसाने दिलेली दडी. जूनमध्ये राज्याच्या बहुतांशी भागांत पेरणीयोग्य पाऊस नव्हता. यामुळे कडधान्य पेरणीवर परिणाम झाल्याचे दिसते.

तुरीखाली सरासरी जवळपास १३ लाख हेक्टर क्षेत्र आहे. पण मागील हंगामात ११ लाख २१ हजार हेक्टरवर पेरा रखडला होता. पण यंदा लागवडीत तब्बल ९ टक्क्यांची घट दिसते. राज्यात तुरीखाली आतापर्यंत केवळ १० लाख २१ हजार हेक्टर क्षेत्र आले आहे.

यवतमाळमध्ये सर्वाधिक क्षेत्र
लातूर विभागात तुरीची सर्वाधिक ४ लाख १४ हजार हेक्टरवर लागवड झाली. जिल्हानिहाय यवतमाळ जिल्ह्यात सर्वाधिक एक लाख ७ हजार हेक्टरवर तुरीची लागवड झाली. त्यानंतर अमरावती जिल्ह्यात एक लाख ६ हजार हेक्टर क्षेत्र आहे. बुलडाणा जिल्ह्यात ८३ हजार, वाशीम ६२ हजार, लातूर ६३ हजार, नांदेड ६२ हजार, वर्धा ५८ हजार आणि नागपूर जिल्ह्यात ५४ हजार हेक्टरवर आतापर्यंत तुरीची लागवड झाली.