विषबाधेप्रकरणी स्वित्झर्लंड सरकार देणार कायदेशीर मदत

यवतमाळ : अतिघातक रसायनांमुळेच अंगात विष भिनल्याने (Poisoning Due To Pesticide) आमच्या पतीचा मृत्यू झाला. परिणामी, सिंजेटा कंपनीने (Syngenta Pesticide) भरपाई द्यावी, अशी मागणी शेतकरी विधवांनी (Farmer Widow) केली होती. त्याकरिता स्वित्झर्लंड येथील न्यायालयात (Swiss Court) दावा दाखल करण्यात आला. आता स्वित्झर्लंड सरकारने या दाव्याचा खर्च करण्याचा निर्णय घेतला आहे.

यवतमाळ जिल्ह्यात २०१७ मध्ये कपाशीवर गुलाबी बोंड अळीचा प्रादुर्भाव झाला होता. त्याच्या नियंत्रणासाठी शिफारस नसताना एकाहून अधिक कीटकनाशकके एकमेकांत मिसळून फवारणी करण्यात आली. त्यामुळे शेकडो शेतकऱ्यांना विषबाधा झाली. यामध्ये २३ शेतकऱ्यांना प्राण गमवावे लागले. अतिजहाल श्रेणीतील ‘सिंजेंटा’च्या ‘पोलो’ या ब्रँडचा वापर शेतकऱ्यांनी फवारणीसाठी केला. यातील घटक कपाशीसाठी शिफारशीत नाहीत. मात्र तरीही त्याचा वापर करण्यात आला.

दोन शेतकरी विधवांसह अन्य एकाने सिजेंटा कंपनी विरोधात स्वित्झर्लंडमधील बासेल येथे न्यायालयीन दावा दाखल केला. त्याद्वारे भरपाईची मागणी केली. या तीनही फिर्यादींना ॲग्रो केमिकल कंपनी सिंजेंटा विरुद्ध स्वित्झर्लंडमध्ये त्यांच्या केसचा पाठपुरावा करण्यासाठी कायदेशीर मदत दिली जाईल. सिंजेंटा मात्र जबाबदारी नाकारत आहे. स्थानिक अधिकाऱ्यांनी घेतलेल्या पोलिस नोंदीनुसार विषबाधांच्या ९६ प्रकरणांपैकी ज्यामध्ये दोघांचा मृत्यू झाला, ते पोलो नावांच्या सिंजेंटाच्या कीटकनाशकाशी संबंधित होते.