Soybean Crop : पाऊस नसल्यामुळे सोयाबीनला फटका

Nashik News : दोन वर्षांपासून सोयाबीनला चांगला दर मिळत असल्याने निफाड तालुक्यात चालू खरीप हंगामात सरासरीपेक्षा १२५ टक्के क्षेत्रावर सोयाबीनचा पेरा झाला. मात्र, पावसाचा खंड, त्यातच तणनाशक फवारणी केल्याने पिकावर विपरित परिणाम दिसून येत आहे.

जिल्ह्यात सर्वाधिक सोयाबीन पेरा असलेल्या निफाड तालुक्यात ही परिस्थिती आहे. याबाबत शेतकऱ्यांच्या मोठ्या प्रमाणात तक्रारी समोर आल्या आहेत. दरम्यान, पीक पिवळे पडल्याने शेतकऱ्यांना उत्पादन घटण्याची भीती सतावत आहे. त्यामुळे कृषी विभागाच्या अधिकाऱ्यांनी क्षेत्रिय पातळीवर पाहणी केली आहे.

निफाड तालुक्यात सोयाबीन पेरणीचे सरासरी क्षेत्र १८ हजार ७२७ हेक्टर आहे. मात्र चालूवर्षी २३ हजार ३४८ हेक्टरवर १२५ टक्के पेरण्या झाल्या आहेत. पहिल्या टप्प्यात झालेल्या पेरण्यांमध्ये चांगली जोमदार वाढ दिसून आली आहे. मात्र नंतरच्या टप्प्यात झालेल्या पेरण्या काहीशा अडचणीत सापडल्या आहेत.

वाढीच्या अवस्थेत पावसाने ओढ दिली. त्यामुळे उशिराने पेरणी झालेल्या पिकाला पाऊस व तणनाशक फवारणीचा फटका बसला. त्यामुळे सोयाबीन पिकाची पीक परिस्थितीची पाहणी कृषी विभाग व कृषी संशोधन केंद्र, कुंदेवाडी यांनी संयुक्तपणे शिवाराची पाहणी करण्यात आली.

पिंपळगाव बसवंत, कोकणगाव, साकोरे मिग परिसरातील पिकांची पाहणी पथकाने केली. त्यात तालुका कृषी अधिकारी सुधाकर पवार, कुंदेवाडी कृषी संशोधन केंद्राचे डॉ. योगेश पाटील, प्रा. भालचंद्र मस्के यांनी अन्नद्रव्ये व विद्राव्य खतांची शिफारस केली. शेतकरी प्रशांत मोरे, आशा लोकणार, बबेभाऊ बोरस्ते, ज्ञानदेव बोरस्ते यांच्या बांधावर जाऊन पथकाने पाहणी केली. कृषी अधिकारी गणपत शिंदे, प्रमोद पाटीलही उपस्थित होते.

तज्ज्ञांनी दिलेला सल्ला

सद्य:स्थितीत निफाड परिसरात सोयाबीनचे पीक पिवळे पडलेले दिसून येत आहे. काही ठिकाणी थोड्या प्रमाणात पिवळे दिसत आहे तर ज्या ठिकाणी पिकावर तणनाशक फवारले आहे त्या ठिकाणी जास्त प्रमाणात सोयाबीनची पाने पिवळसर तसेच करपलेली दिसून येत आहेत.

तसेच सध्या पाऊस नसल्याने पिकाची समाधानकारक वाढ दिसून येत नसून अशा वेळेस पिकावर सूक्ष्म अन्नद्रव्ये ग्रेड-२ हे खत १० ग्रॅम/मिली प्रतिलिटर पाणी या प्रमाणात फवारणी करावी. जमिनीत कमी ओल व पाण्याचा ताण दिसून आल्यास १३:००:४५ या पाण्यात विद्राव्य खताची १० ग्रॅम प्रति लिटर पाणी या प्रमाणात फवारणी करावी.