Solar Energy : कुंभोजला ४.४ मेगावॉटचा सौरऊर्जा प्रकल्प कार्यान्वित

Kolhapur News : मुख्यमंत्री सौर कृषी वाहिनी योजनेअंतर्गत कुंभोज येथे ४.४ मेगावॉटचा सौर ऊर्जा प्रकल्प कार्यान्वित करण्यात महानिर्मितीला यश आले आहे. या सौर ऊर्जा प्रकल्पामुळे कुंभोज आणि हिंगणगाव या दोन गावांतील सुमारे १५०० कृषी वीज ग्राहकांना सौरऊर्जेचा लाभ होऊन, विशेषतः ५ एच.पी.चे सुमारे १०४० कृषी पंप ऊर्जित होणार आहेत.

हा प्रकल्प महावितरणच्या ३३/११ के.व्ही. कुंभोज उपकेंद्राला जोडण्यात आला आहे. सुमारे ९ हेक्टर शासकीय पडीक जमिनीवर प्रकल्प उभारण्यात आला असून, प्रकल्प उभारणीचा खर्च १८ कोटी आहे.

महानिर्मिती, मेसर्स ई.ई.एस.एल. (विकासक), मेसर्स टाटा (सब व्हेंडर) आहेत. हा प्रकल्प कार्यान्वित झाल्याने महानिर्मितीची एकूण सौर ऊर्जा स्थापित क्षमता ३७६.०२ मेगावाट इतकी झाली आहे.

या सौरऊर्जा प्रकल्पामुळे स्थानिक पातळीवर प्रत्यक्ष-अप्रत्यक्ष ४० व्यक्तींना रोजगार उपलब्ध झाला आहे. सौर ऊर्जेद्वारे वीज सुमारे ३.३० रुपये प्रतियुनिट दराने महावितरणसमवेत वीज खरेदी करार करण्यात आला आहे.